Benitez-a'n sum hman tur a ngah dawn

Newcastle United neitu Mike Ashley chuan manager Rafael Benitez nen inbiakna an neih ṭum­in Premier League-a in­hlankaipuitu coach hi pound maktaduai 100 bawr vel thleng players lakluhna tur an pek tur thu a hrilh.

Liverpool boss hlui hian season hmasa tawp hnaih lamah Magpies hi a zawm a, Premier League-ah inhamtanpui zo lo mah se rin loh takin English club hi a enkawl chhunzawm. Championship-ah season khat bak hun a mamawh lo a, champion nomawi chawiin Premier League lamah a kirpui leh ta.

Ashley chuan, "Benitez leh ma­naging director Lee Charnley hnenah Premier League kan inhlankai avanga kan sum dawn tur piahlamah transfer aṭanga kan sum hmuh zawng zawng an duh anga an hman theih tur thu ka hrilh a ni," a ti a, season tharah tih mai mai an tum lo.

Benitez pawhin club neitu nena an inhmuh chung­chang sawiin, "Meeting kan neih danah ka lawm a, tun season-a bul kan lo ṭan tawh squad ti chak tura kan hmachhawpah pawh ka hlim takzet. Kan hmaah chona tam tak a awm dawn ngei a, nipui transfer hi a awlsam dawn lo. Mahse, rim taka hna kan lo thawh tawh sa hi chuti maia thamral tir kan tum dawn lo a, tunah chuan squad tih chak dan tur ngaihtuah chungin ṭha takin season kan ṭan thei ang," tiin a phur hle.