Pathianni tlai dar 4:00-ah Aizawl FC Vs Bengaluru FC
Federation Cup semifinal-ah Aizawl FC-in May 14, Pathianni tlai dar 4:00 hian Barabati Stadium, Cuttack-ah Bengaluru FC an hmachhawn dawn. Mizo club hi season liam ta finalist niin first round-a Bengaluru FC petchhuaktu a ni bawk.
Zan dar 7:00 khian semifinal pakhat zawkah Kolkata Derby hmuh tur a awm dawn a, champion lai Mohun Bagan leh an hmelma East Bengal inkhel hi a hmuhnawm ang.
Mizo hlang
Ningani tlaiah tla tawh Chennai City-in semifinal beisei nei Churchill Brothers 3-1 a an barakhaih avangin East Bengal chu Mizo club an hmachhawn hmain semifinal an lut.
Group hmahruaitu inchuhnaah I League-a Aizawl FC champion puitu Khalid Jamil-a'n Mizo hlangin starting eleven a rem a, thutlukna huaisen tak a ni. Inkhel bul ṭantuah hian Mizo zinga bul ṭan ṭhin Lalruatthara, Zohmingliana Ralte, Lalramchullova, R. Laldanmawia leh Brandon VL Remdika te awm lo.
Khalid-a player 11 thlanchhuahte chu Lalawmpuia, Lalrinzuala Khiangte, Lalṭhakima, Lallawmzuala, Lalhriatrenga, Albert Zohmingmawia, Lalnuntluanga, Lalnunpuia Tlau, H. Lalmuankima, Jojo Lalrawngbawla leh William Lalnunfela te an ni.
East Bengal manager Trevor Morgan thlaktu Ranjan Bhattacharya-a'n Mizo tlangval hmachhawn turin player ṭha a luhtir a, foreigner tel lohna Mizo club nen an intluktawk - goal awm loin point khat an insem.
Mizo club Aizawl FC chu Group A hmahruaitu an ni a, an hnuaiah I League ang thoin Kolkata club lian East Bengal an awm.
Lajong chakna Mizo
Shillong Lajong-in semifinal beiseina nei turin DSK Shivajians goal hnih tala an hneh a ṭul a, Pune club-in point thum tho an hmuh avangin nimin tlai inkhelah attacking football an pho chhuak.
DSK player hmuhnawm Lallianzuala Chhangte vanneih ṭum a ni lo a, Lunglei tlangval shot hian goal ban a pahnih a per hnuah a goal lo a, second half-ah Lianzuala hian keeper chiah a hmachhawn hnuah ṭum hnih a hlah leh bawk.
Lajong-in 2-1 a hma an hruai laiin Lajong keeper Vihsal Kaith-a'n Lianzuala tlan chak vangin red card a hmu a, hemi hnu hian DSK-in an siphurh an sut. Amaherawhchu Lajong-in injury time-a Mizo tlangval Samuel Lalmuanpuia goal khung hmangin hnehna an chang.
Shillong club-in hnehna chang mah se referee-in hun tawp hamrik a ham rualin semifinal beiseina a tawp a, DSK erawh Mohun Bagan-in Bengaluru FC an hneh chuan knockout stage lut thei an ni.
East Bengal thlangtu Bagan?
Mohun Bagan-in semifinal an lut chiang tawh a, point an hmu lo a nih chuan an hmelma East Bengal pumpelh theih a ni.
Bengaluru FC-in Alwyn George hmangin minute 11-naah an khung a, 1-0 in inkhel tawp se Bagan khingpui tur chu Aizawl FC a ni. Amaherawhchu, Mariners hian hmahruaitu nih an duh a, I League champion AFC aiin an hmelma Red and Gold hmachhawn an thlang bawk.
Mohun Bagan-in Jeje Lalpekhlua hoin an siphurh sut tumin an nawr let a, second half minute 50-naah Sony Norde hmangin an sut. Bengaluru FC tan goal chhuah belh a thiang lo a, captain Sunil Chhetri inhliam avangin Mizo midfielder Malsawmzuala rawn inlanin point khatah an lungawi tih a hriat theih.
Goal dang a luh belh tawh lo a, point khat hlawh chhuak Bengaluru FC-in semifinal an luh laiin player 10-a khel Shillong Lajong laka tlawm DSK Shivajians an tla.
Bengaluru bawk
Mizoram chhunga I League match hmasa ber chu Bengaluru FC leh Aizawl FC inkhel a ni. BFC hian league match vawi lia Aizawl FC an hmachhawn tawhah chak loh nei loin vawi thum an chak.
Mizo club tana thu lawmawm erawh Federation Cup-ah Bengaluru FC hi ṭum hnih an khelhpui tawh a, an hneh ve ve. Hei bakah hian AFC hi I League champion an ni a, Mizo club hi tun dinhmunah chuan Bengaluru FC aia dah san an la har rih deuh a nih pawhin an hniam zawk lo tih chu a chiang a ni.
Inelna Thlirna Tawi
Group A
May 7, Pathianni
Chennai City 2 - 3 Aizawl FC
CCFC : Charles De Souza 13'; Edwin Vanspaul 39'
AFC : Mahmoud Al Amna 53'; R. Laldanmawia 62', 81'
East Bengal 1 - 1 Churchill Brothers
EB : Wedson Anselme 66'
CB : Ansumana Kromah 81'
May 9, Thawhlehni
East Bengal 2 - 0 Chennai City FC
EB : Robin Singh 45+1', 76'
Aizawl FC 2 - 1 Churchill Brothers
AFC : Lalramchullova 21'; R. Laldanmawia 90'
CCB : Ansumana Kromah 84'
May 11, Ningani
Chennai City FC 3 - 1 Churchill Brothers
CCFC : Dhanpal Ganesh 18'; Edwin Vanspaul 61'; Charles de Souza 79'
CB : Brandon Fernandes 81' (P)
Aizawl FC 0 - 0 East Bengal
Team Dinhmun
# Team Pld W D L GF GA GD Pts
1 Aizawl FC 3 2 1 0 5 3 2 7
2 East Bengal 3 1 2 0 3 1 2 5
3 Chennai City 3 1 0 2 5 6 -1 3
4 Churchill Brothers 3 0 1 2 3 6 -3 1
Group B
May 8, Thawhṭanni
Bengaluru FC 3 - 2 Shillong Lajong
BFC : Udanta Singh 35'; Eugeneson Lyngdoh 46'; Aiborlang Khongjee 74' (OG)
SLFC : Yuta Kinowaki 72'; Samuel Lalmuanpuia 85' (P)
Mohun Bagan 4 - 0 DSK Shivajians
MB : Balwant Singh 24', 71'; Darryl Duffy 65'; Jeje Lalpekhlua 90+2'
May 10, Nilaini
DSK Shivajians 2 - 0 Bengaluru FC
DSK : Juan Quero 71' (P), 76'
Shillong Lajong 2 - 3 Mohun Bagan
SLFC : Pritam Kotal 3' (OG); Yuta Kinowaki 80'
MB : Darryl Duffy 5'; Sony Norde 27'; Katsumi Yusa 43'
May 12, Zirtawpni
Shillong Lajong 3 - 2 DSK Shivajians
SLFC : Alen Deory 49'; Redeem Tlang 68';
Samuel Lalmuanpuia 90+2'
DSK : Holicharan Narzary 64', 86'
Mohun Bagan 1 - 1 Bengaluru FC
BFC: Alywn George 11'
MB: Sony Norde 50'
Team Dinhmun
# Team Pld W D L GF GA GD Pts
1 Mohun Bagan 3 2 1 0 8 3 5 7
2 Bengaluru FC 3 1 1 1 4 5 -1 4
3 Shillong Lajong 3 1 0 2 7 8 -1 3
4 DSK Shivajians 3 1 0 2 4 7 -3 3
Semifinal - May 14, Pathianni
4:00 PM Aizawl FC Vs Bengaluru FC
7:00 PM Mohun Bagan Vs East Bengal
Final
May 18, Ningani Mohun Bagan leh
Bengaluru FC ten final an luh loin
May 21, Pathianni Mohun Bagan emaw
Bengaluru FC emawin final an luhin