A hunah tak Mapuia Vikings hmaa ding tur TBL

Mizoram Super League cham­pion lai Khatla TBL tak tak kan hmu leh ta. Ningani zan MSL3 semifinal game 3 inkhelah TBL hian Zarkawt BCA chu 73-46 a sawpin final an lut.

Mizoram Basketball Assciation buatsaih MSL hi season hnih neih a ni tawh a, TBL chiah champion thei an la awm. H. Laldinsanga kaihhruaina hnuaia khel club hian lungthu kim nan nomawi chawi an duh a nih chuan Mission Veng Vikings an hneh a ngai dawn - May 16, Thawhlehni zanah Finals Game 1 khelh a ni ang.

Semifinal Game 1-ah TBL hian BCA an pawtthla a, an game hnihnaah erawh hun tawp dawnah Zarkawt club-in an lehthal ve thung. Game 3-ah TBL lamin champion zia chhuahin quarter tinah an chungnung zawk vek a, a tawpa an san zawkna chu point 27 zet a ni.

Hei le, Mapuia

R. Dengṭhuama Indoor Sta­dium-ah TBL hian chak tumin inkhel bul an ṭan a, zan danga inlan tam ngai lo Mapuia pawh court chhungah kan hmu hnem hle. Season hmasa ber Most Valuable Player hian double double neiin, point 17 a score bakah assist vawi 10 a nei bawk - hun harsa a mamawh chhanna chu Mapuia bawk a ni.

TBL manager Lalawmpuia Pachuau chuan, "Mapuia hian tualchhung player dangte tan khelhna hun siamsak a duh avangin hun tam zawkah chuan a inlan lo ṭhin, tun ṭumah erawh chak kan duh a, kan mamawh hunah tak a rawn inlar leh a ni," tiin Vanglaini a hrilh.

Khatla club tan hian Mapuia bakah MVP nilai Vanlalmuana leh Akash Deep Hazara te an langsar hle. Muana hian point kua score-in Akash hian point 20 a nei thung. West Bengal tlangval hian point a ngah ber bakah an lakluh chhan ang takin BCA attack chhu chattu a ni a, an khingpui basket neih tur tam tak a dan sak a ni.

P. Om-a chuan sawi chhunzawm­in, "Ka nauten chak duhna thinlung nen court chhung an lut a, fans puihna nen huaisen taka an beih avangin hnehna kan chang, kan chak chhan bul ber erawh Pathian vang a ni," a ti.

BCA an chuai

Tualchhung player hlangin BCA-in season bul an ṭan a, Amritpal leh Yadwinder Singh te an neih belh hnuah phei chuan dan theih loh an ni. State pawn player an chhawr theih loh hnuah pawh hneh loh nei loin league round-ah an chak fai vek.

Semifinal boruak sangah player naupang rual an nihna a lang a, Game 2-a roreltu Zonunsanga'n quarter hmasa bera point hnih a neih bak a score belh lo - Matthew Remtluanga Sailo leh Henry Lalramngaihawma te hi theihna sang tak nei ni mah se hun pawimawhah an la patuai deuh.

BCA coach Lalruatfela chuan, "Kan khel thei thlawt lo a ni, kan tum dan leh ruahman angin thil a kal thei lo a, tihsual kan ngah hle bawk. Tun season-a kan khelh chhiat ber ni kan tawn avangin a chak lo zawkah kan ṭang," tiin Vanglaini a hrilh.

Afela chuan sawi zawmin, "MSL3 aṭangin tla mah ila kan rawn tho leh ang, kan naute hi theihna nei sang tak tak nei an ni hlawm a, season tharah chuan champion turin kan lo kir leh ang," a ti. BCA coach chuan inelna buatsaihtu MBBA leh fans chungah lawmthu a sawi bawk.