Stockholm pan tur United leh Ajax

Manchester United-in Eu­ropa League final lut turin Celta Vigo lakah vanneihna an mamawh a, an khingpui tur Ajax pawhin Lyon ral lian an paltlang hram bawk. Europe-a sulhnu nei ṭha pahnih te hian May 24 zan khian Stockholm, Sweden-ah nomawi an inchuh ang.

Old Trafford-ah hlimna

Spain-ah Manchester Uni­ted-in Marcus Rashford-a goal hmangin Celta Vigo 1-0 in an hneh tawh a, Ningani zan in­khelah pawh Rashford-a ball vawrh luh chu Marouane Fellaini-a'n minute 17-naah tauh goal-in aggregate-ah 2-0 a ni.

Old Trafford-ah United

ṭan­tute ngaih ṭha taka an awm laiin Celta defender Facundo Roncaglia-a'n minute kua chiah a awm tawh tihin a tauh goal a, boruak a dang vek. Spanish club hian goal khat an dang an khung leh thei a nih chuan away goal rule hmangin hnehna an chan dawn vang a ni.

Minute 87-naah buaina a chhuak a, United defender Eric Bailly chu Swede forward John Guidetti laka a kut a thawh avangin hnawhchhuah a ni a, hemi thungrultu Celta de­fender Roncaglia chu hnawh­chhuah a ni bawk.

Injury time-ah minute ruk pek belh a ni a, 'Manchester pawl tir ka tum ang' titu Manchester City striker hlui Guidetti yard ruk vel lek aṭangin goal ruakah a khung lo. Hun tawp rualin Celta player ṭhenkhat inzum zo loin an mittui a tla a, khelmuala bawk nghal thlawp an awm bawk. Team vannei zawk United ṭan­tute erawh an lawm a, Old Traf­ford-ah hlimnain ro a rel.

Manchester United manager Jose Mourinho chuan, "First leg-a goal chance kan hlah nasat kan tuar a, kan mualah chuan kan innawr tawn avangin engtik lai pawhin pressure kan nei reng a ni. Ka nauten an theihna zawng zawng an chhuah a, an chungah ka lawm hle a ni. Match 14 zawhah final kan lut a, Europa League nomawi chawi hi ka duhthusam a ni tawh a, kan champion chuan a ropui khawp ang," tiin a sawi.

Ajax an talbuai

Ajax-in an muala 4-1 laia hnehna an chang tawh chungin Parc Olympique Lyonnais-ah an ṭang tluan zo lo teuh hle. Danish forward Kasper Dolberg-a'n Lyon laka an dinhmun sawhnghet turin minute 27-naah cool takin a khung a, aggregate-ah 5-1 a nih tawh avangin Ajax an himah a ngaih theih.

Amaherawhchu, Lyon-in tum dan dang an nei a, French forward Alexandre Lacazette-a'n first half tawp hmain goal hnih khungin minute 81-naah Algerian winger Rachid Ghezzal-a'n goal khat a khung belh leh a, extra time thleng turin goal khat dang an la mamawh. Minute ruk a la awm tihin Ajax defender Nick Viergever chu hnawhchhuah a ni zui a, player 10-a khel hmaah Lyon tlarhmate an hriam tawk loh zarah Dutch club an him hram.

Hun tawp hamrik zawha Ajax player-te kum chawhrual hi kum 21 pawh a tling pha lo a, rawlthar tha za rual hi final-ah Manchester United lakah fiahin an awm ang.

Europa League a hlu!

Kum 2013 khan Europa League-ah Spanish manager Rafael Benitez-a'n Chelsea a champion pui a, Blues hian nipuiah Jose Mourinho la lutin Portuguese manager hian, "Europa League champion hi ka duh lo. He nomawi hi la ilang chuan ka hnual khawp ang. A chhan chu ka player-te hian Europa League hi an inelna turah an ngai tur a ni lo," tiin a hmalam hun ngaihtuah loin a ṭawng.

Kum li chauh a ral tihin Mou­rinho-a'n season thara Champions League an khelh theih dan kawng chu Europa League champion a ni tih a hriat avangin a la thutak tawh hle. United hian an club history kum 115 chhungin nomawi 65 an chawi tawh a, an la champion lohna Europa League nomawi an chawi thei a nih chuan an nomawi dah khawmna hmun­ruak awm chu hnawh khahin a awm dawn tihna a ni.

United hian Pathianni zan dar 9:00 hian White Hart Lane-ah Tottenham Hotspurs an tlawh ang.