Number 1 Murray a tla

World number 1 Andy Murray chu Borna Coric hneh loin Madrid Open last 16 aṭangin a tla. Seeded pathumna Stan Wawrinka pawh quar­ter final lut zo loin a zinkawng a tawp ve bawk.

Ningani zan Spain khawpuia inkelah Britain tlangval Murray hi world number 59 lakah 6-3, 6-3 in a chak lo a ni. Kum 20-a upa Coric hian set khatnaah Murray service hi vawi thum a chhuhsak a, set hnuhnung zawkah ṭum khat a chhuhsak bawk.

A dar na a dam hnuah pawh Murray hian beisei a phak thei rih lo. Kumina clay court tournament a khel tawh hoah final a la lut lo a ni. Monte Carlo-ah last 16-ah a tla a, Barceloan Open semifinal lut ve mah se Dominic Thiem a hneh lo - May 28 aṭanga khelh tur French Open atan inbuatsaihna a nei ṭha rih lo hle.

Kum 29-a upa Murray chuan, "Tihsual ka ngah hle a, ka service a ṭha tawk lo bawk. Ka chak lohna hian chona min pek ngei ka duh a, clay-a hlawhtling tur chuan rang taka ka insiam-ṭhat a ngai," tiin a sawi.

Grand Slam vawi 3 cham­pion tawh Murray hian Coric lakah winners vawi 14 a nei a, set hnih chhung lekin unforced errors ṭum 28 a neih bakah a service a la ṭha tawk rih lo a ni.

Inkhel dangah Waw­rinka chu world number 52 Benoit Paire lakah 7-5, 4-6, 6-2 in a chak lo ve bawk. Wawrinka hian tun hmain Prior hi ṭum sarih a hneh tawh a, tun ṭum hi vawi hnih a hneh lohna chiah a ni.