ISL-ah hmun ruak pathum
Indian football kal zel dan tur chiang lo nuai karah Indian Super League chuan season thar atan hmun ruak pathum an zuar a, a duh duh chhan ngawt theih erawh a ni lo. ISL huaihawttu Football Sports Development Limited (FSDL) chuan May 12 - May 24 inkarah ISL club hmunruak dilna hun an hawng.
ISL-a tel duh club chu heng khawpui Ahmedabad, Bengaluru, Cuttack, Durgapur, Hyderabad, Jamshedpur, Kolkata, Ranchi, Siliguri leh Thiruvananthapuram behchhan an ni tur a ni tih a ni a, Kolkata aṭanga diltu chu an dilna pawmsak an nih chuan season hnih chhung (2017/18 leh 2018/19) chu Atletico de Kolkata nen buaina a awm loh nan Kolkata khawpui pawnah an home match an khelh a ngai ang.
I League-a vawi hnih champion tawh Bengaluru FC chuan ISL-a tel an duh thu an tichiang tawh. BFC technical director Mandar Tamhane chuan, "Lehkha pawimawh chu kan la fel tawh," tiin I League chhuahsana ISL zawm an duh thu a tichiang.