Playoff khel tur Hollow
Chanmari Hollow tan Mizoram Super League Season 4 khelh theihna kawng a la inhawng. R. Dengṭhuama Indoor Stadium-ah Hollow hian Ningani tlai khan Zarkawt Serpents 79-76 in an hneh.
MSL season thum buatsaih tawha la inlan vek Serpents tan MSL4-ah hmun a awm tawh dawn lo. Relegation playoff a hnehna changtu Hollow hian Divison 1 lama pahnihna Dawrpui Vengthar SC nen qualifying an khel ang - playoff hi best of three series hmanga khelh leh tur a ni.
Tun season-ah Hollow leh Serpents ten club dang an el phak lo deuh a, league round-ah vawi khat ve ve bak chak ni hmel an hmu lo. Playoff-ah club pahnih hi an inkhel tawk hle a, game 2-ah phei chuan over time vawi hnih khelh hial a ni.
Game 3-ah pawh chungnung zawk an awm lo a, Serpents lam hian quarter hmasa berah point 16 score-in point khat lekin an chungung zawk a, quarter hnihna (14 points) leh thumna (20 points) ah an score zat a intluk chiah. Quarter hnuhnung berah Hollow hian point lia score tam zawkin hnehna an chang hram a ni.