Palina inchuh Liverpool, City leh Arsenal inlan dawn

Premier League nomawi beisei ngam tawh lo mah se club lian ṭhenkhat tan inkhel pawimawhna a nep phah chuang lo. Season thara Champions League khelh tum Liverpool, Manchester City leh Arsenal te tan point khat chauh pawh hloh a thiang tawh lo.

Vawiin tlai dar 5:00-ah City hian champion lai Leicester City an mikhual dawn a, dar 10:00-ah Arsenal chu Stoke City khelmualah an lenglut bawk ang - City leh Gunners hian point thum an hmu theih a nih chuan Pathianni zan dar 6:45-a West Ham tlawh tur Liver­pool tan pressure an siamsak ang.

Jurgen Klopp-a nauten tun season-ah Hammers leh Middles­brough bak hmachhawn tur an nei tawh lo, tun dinhmunah point 70 hmuin table-ah pathumna an ni a, an khelh hmabakah hian an chak ve ve a nih chuan pangana Arsenal tan umphak theih an ni tawh dawn lo.

Reds manager Klopp chuan, "Point 70 kan hmu tawh a, a chhe rih lo hle. Kan thlen chinah hian kan lawm rualin hetiang zat nena season khar hi kan duh tihna a ni kher lo," a ti. Point hmuh belh a la tum chiang, German manager hian West Ham chu khingpui hautak tak an nih tur thu leh ṭum dang ang bawkin an fight tur thu a sawi tel bawk.

Liverpool leh Hammers te hi nikum December thla khan Anfield-ah 2-2 in an inhnehtawk tawh. Tun ṭum hi Slaven Bilic-a naute tan tun season league match bikah chuan Olympic Stadium-a an match hnuhnung ber tur a ni, beisei anga season hmang ṭha lo Hammers hian a tawp khar ṭhat an duh ang.

Pep a zam lo

Manchester City manager Pep Guardiola chuan a sang pali zinga tel tura inum boruak a san thu a sawi a, match hnuhnung ber thlenga a pawimawh vek thu a sawi. Chelsea leh Tottenham chu UCL khel turin an tling chiang tawh a, Manchester United pawhin Europa League nomawi chawi chunga Europe football inelna sang ber khelh an tum.

Pep chuan, "Team ṭha paliin hmun ruak pahnih kan inchuh mek a ni a, a nuamin a mak zawk hle. Inelna hautak a ni tawh a, tu tan pawh point hloh a thiang tawh lo. Manchester United hi chuan Europa League an dah lian tawh zawk, season tahrah EPL club pangain Champions League kan khel a nih chuan a ropui khawp ang," a ti.

City hian Leicester lakah Clau­dio Bravo leh Ilkay Gun­dogan te an chhawr thei dawn lo tih a chiang a, striker Sergio Aguero leh defender John Stones te dinhmun a chiang lo bawk.

Foxes midfielder Danny Drink­water tan season a tawp tawh a, defender Robert Huth leh Wes Morgan ten hliam an neih bawk avangin Craig Shakespeare leh a nau ten Etihad Stadium-a point hlawh chhuak tur chuan an thawhrim a ngai hle ang.

Gunners beiseina

Arsenal manager Arsene Wenger-a'n Tottenham nen North London derby an khelh hmain hnehna an chang a nih chuan Champions League an khelh a beisei thu a sawi a, Spurs lakah an tlawm. Gunners hian Manchester United leh Southampton 2-0 in an hneh leh tawh a, palina ni turin kawng inhawn zau phah lo mah se beiseina leh inrintawkna erawh an neih belh.

Gunners hian Stoke bakah Sunderland leh Everton an la hmachhawn dawn, hnehna chang vek pawh ni se an chunga awm Reds leh City an chesual a nih loh chuan an umphak thei tawh lo. Wenger-a'n a enkawl hnulama UCL la khel ziah London club dinhmun a ṭha rih lo hle a, chutihrualin an manger a la beidawng lo.

Kum 67-a upa Wenger chuan, "Chak vek a ngai tiin ka sawi tawh a, chumi hnuah kan chesual leh. Spurs kan hneh loh vang khan kan zuih ral tihna a ni bik lo, kan elpui club dangte hi chesual thei ve tho an la nih avangin a tawp thleng rakin kan bei tur a ni," a ti.