La Liga Boruak a 'hot' chho ṭan!
Spanish La Liga hmawr an bawk hnai tawh a, boruak a 'hot' chho ṭan hle. Champions League final lut hlim Real Madrid-in Pathianni zanah fiahna hautak an hmachhawn dawn a, Santiago Bernabeu-ah Sevilla an mikhual ang - Zinedine Zidane-a naute hi hmahruaitu Barcelona nen point hmuh zat in ang reng mah se match khatin an khel tlem zawk a, club pahnih tan tawlhthluk a thiang tawh lo.
Pathianni zan dar 11:30-ah vek Barcelona-in Las Palmas an lenchilh dawn. Match hnih bak khelh tur nei tawh lo Barca-in an hmabak match hniha chak ve ve a, Real tawlhthluk an chan tel a ngai bawk - Palmas lakah tlawm an tum lo tawp ang.
Real an chau
A zawna Champions League final lut hlim Real Madrid-in an hnathawh ropui lawmna hun pawh an neih tak tak hmain La Liga match an nei lehnghal a, an mikhual tur lah season thara Champions League khelh tum Sevilla an ni. Real boss Zidane chuan, "Final sawi thei kan la ni lo a, Sevilla nen inkhel pawimawh tak kan nei a ni," tiin league match khel tura an inbuatsaih nghal thu a sawi.
Atletico Madrid laka inlan player-te an chau dawn tih erawh a chiang a, Zinedine Zidane-a'n a naute hliam laka an him theih nan a chhawr rim loh zawk ho a chhawr a nih pawhin a mak lo ang.
Mahse, Madrid B team tia hminglem an pek James Rodriguez leh Alvaro Morata te ho hi eng team pawh hneh thei khawpa ṭha an la ni tho - a awih lo tan 4-0 a Granada an sawpna leh Deportivo La Coruna laka 6-2 a an thiam thil an 'show' na kha en mai tur a ni! Santiago Bernabeu-a an len hnuhnung match kuaa chak hmel hmu lo Sevilla tan hna a awlsam dawn lo.
Barca an hahdam
Barcelona-in an duh aia hmain Champions League mangṭha mah se an vanduaina hi vanneihnaah an chantir thei - league nomawi chawi tura an elpui Real Madrid khelh chauh laiin an awm hahdam a, boss Luis Enrique-a'n an ṭhat dan berin a naute a remkhawm thei dawn tihna a ni - Las Palmas tan mikhual châkawm an ni lo!
Enrique-a'n season tharah Catalan club a chhuahsan tawh dawn avangin league nomawi tal chawi loa club ropui mangṭha a duh dawn lo a, Champions League-a Real inkhelh chauh lai khan Pathianni zana an inlan hunah hahdam taka an khelh theih nan a naute chu ni hnih chawlh a pe!
Barcelona player-te hian Nilaini khan training erawh an ṭan leh tawh a, senior players rinrawl zingah hliam an awm rih lo - an match hnuhnung pangaa chak hmel hmu lo Las Palmas tan chak beiseina a tlem khawp ang.
Godin tel loin Atletico
Atletico Madrid-in Pathianni zan dar 11:30-ah Real Betis an lenchilh dawn a, captain Diego Godin chu hrem vangin a inlan thei dawn lo. Uruguayan defender hi Eibar laka 1-0 a hnehna an chan ṭumin hnawhchhuah a ni a, match official laka a chet mawi loh avangin Royal Spanish Football Federation chuan match thum khel thei lo turin an hrem.
Diego Simeone-a nauten league match hnih chiah khelh tur an neih tawh avangin tun season-ah Godin-a hmel kan hmu tawh dawn lo tihna a ni a, season thara an match hmasa berah a inlan thei lo bawk ang.