Valencia coach thar Marcelino
La Liga lama talbuai mek Valencia chuan kum hnih chhung an club enkawl turin Marcelino García Toral an lalut a, Spanish coach hian season thar aṭangin a hna hi a chelh ṭan ang.
Real Zaragoza leh Sevilla-te pawh lo enkawl tawh Marcelino hi Spanish football-ah a mikhual lo hle. Kum 2013-2016 chhung khan Villarreal coach dinhmun a lo chelh tawh bawk a, Yellow Submarine a enkawl chhungin che chhe lo mah se tun season ṭan dawn khan thuneitute nen an inhmuhthiam loh avangin a bang a ni.
Los Che (Valencia sawina) hian Pako Ayestaran kaihhruaina hnuaiah season bul ṭan mah se result ṭha a neihpui theih loh avangin an ban. Cesare Prandelli enkawlna hnuaiah khel lehin Italian manager hi club hotute nen an inhmuhthiam loh avangin December 2016-ah khan a bang a, manager lailawk ni turin Voro an ruat. Valencia player hlui Voro hian an hmabak match hnihah a la kaihruai rih dawn a ni.