Bouchard a chak lo

Ningani zan khan Madrid Open khelh meka hmeichhe player hmuhnawm bera ngaih Eugenie Bouchard chu Svetlana Kuznetsova hneh loin quarterfinal-ah a tla.

Madrid-a inkhelah Canadian nula hi seeded pariatna Svetlana Kuznet­sova lakah 6-4, 6-0 in a chak lo. Bouchard hian a match hmasa lam angin a khel chhuak lo, a khingpui service chhuhsak theihna hun ṭha vawi khat a neih pawh a chhawr ṭangkai thei lo a ni.

World number 59 Bou­chard-i'n a match hmasa berah Maria Sharapova a hneh tawh, hrem vanga rawn kir hlim a hneh avangin a player pui tam takin lawmthu an hrilh! A match hnihnaah seeded pakhatna Angelique Ker­ber hnehin a sang pariat zingah a in vaw kai leh a, tunah erawh a beiseina a thamral.

Inkhel dangah seeded pathumna Simona Halep chuan darkar khat pawh tling loah Coco Vandeweghe chu 6-1, 6-1 in a sawp. Romanian star Halep hian Anastasija Sevastova a hmachhawn leh ang, Sevastova hian Kiki Bertens chu 6-3, 6-3 in a hneh ve bawk a ni.