LM Store MFA Futsal Cup 2017 Zaninah Champion zawnna
Mizoram Football Association buatsaih LM Store MFA Futsal Cup chu zanin hian R. Dengṭhuama Stadium-ah final khelh a ni dawn. AIFF hriatpui futsal inelna hi Zonet chuan live-in a pe chhuak ang.
Veteran category-ah Dinthar Futsal Club leh 77 FC ten dar 8;00-ah final an khel ang. Hemi zawh hian Open category final-ah City Futsal Club, Venghlui leh Thrematai FC, Electric Veng ten nomawi an inchuh zui ang.
Veteran semi final
Inrinni tlai khan veteran category semifinal khelh a ni a, Dinthar Futsal Club-in Patea Memorial FC 9-7 in an hneh. Inkhel hnuhnung zawkah 77 FC leh G 90's te inkhelh ṭan tirh lamah intluk mah se hun tawp lamah thahrui ngah zawk 77 FC te 11-6 in hnehna an chang.
Dinthar Futsal Club-ah MPL-a an veng club enkawltu coach Lalhlupuia Sailo leh Mizoram Police veteran defender Lalropuia te chu hming langsar zinga mi an ni. Dinthar club hian Dinthar mipui aṭangin ṭawiawmna ṭha an hmu ang.
77 FC hi ṭhianhoa tel niin tun hma player ṭha an inla khawm a, hman nia National Sub Junior-a champion team coach Vanromawia chu coach niin Dinthar FC leh Chhinga Veng FC coach hlui Lalremtluanga chu player a ni! Mizoram forward ṭha ṭhin Tea leh Jack-te bakah Mizoram aiawha khel tawh an awm nual.
A hmuhnawm
Open Category-ah City Futsal Club-in final lut turin Thyristor 4-3 in an hneh hram a, hun tawp hma hretin Isak Vanlalpeka'n chakna goal a khung. Semifinal pakhat zawkah Thrematai-in harsatna an tawk lo a, Electric Veng club hian Durtlang club Denzel FC chu 6-2 in an sawp.
City Futsal Club hi CYMA Football-a Venghlui aiawh tur an ni hlawm a, MPL-a striker ṭha PC Zosanga leh Zo United midfielder Isak-a te chu hming langsar an ni. Venghlui mipuiin an ṭawiawm ṭha dawn.
Thrematai hi Zo United coach hlui Remlalthlamuanpuia'n (Sabito) a ho a, Santosh trophy-a Mizoram player Lalmuanawma leh Lalrinchhana bakah MPL-a kan hmuh Paul Ramfangzauva te khelhna a ni a, team ṭha an ni. Tualchhung football-ah Electric Veng an te ngai lo a, an êng a chhuah leh theih nan ṭantu ṭha an mamawh ang.
MFA chuan season thar aṭangin mumal zawkin futsal kalpui a tum a, LM Store MFA Futsal Cup hi a bul ṭanna a ni.
Zanin Final
Veteran
8:00 PM Dinthar FC Vs 77 FC
Open
9:00 PM City Futsal Club Vs Thrematai FC
Semifinal - May 13, Inrinni
Veteran
Dinthar Futsal Club 9 - 7 Patea Memorial FC
DFC : HT Vanlalremruata 2', 24', 35'; R. Lalbiakmawia 8', 12'; Lalropuia 19', 32', 33'; Hmingthansiama 38'
PM FC : Vanlalhruaia 2', 24'; Vanlalnghaka 3', 10', 26', 28'; Danny Lalduhawma 39'
77 FC 11 - 6 G 90's
77 : Johny Marboh 4', 36'; Roliantluanga 7', 24', 29', 32', 39'; Remsangzuala Tlau 16'; Lalmawizuala 18' (OG); Hmingthansanga 31'; Zosangliana 34'
G90 : Benjamin Lalnunsiama 5'; Lalmawizuala 10'; Patea 22', 38'; Joel 25'; Zara 28'
Open
City Futsal Club 4 - 3 FC Thyristor
CFC : Peter Thangpuia 14', 18'; Isak Vanlalpeka 33', 40'
THY : Lalrinsanga 8', 12', 37'
Denzel FC, Durtlang 2 - 6 Thrematai FC
DFC : R. Lallawmkima 4'; MS Dawngliana 21'
TFC : C. Lalnunmawia 7'; Paul Ramfangzauva 14'; Remlal-
thlamuanpuia 24'; Lalrinchhana 34', 40'; R. Lalmuanpuia 38'