Aizawl FC zinkawng a tawp

I League champion Aizawl FC-in Federation Cup final an thleng zo lo. Nimin tlai khan Barabati Stadium, Cuttack-ah Mizo club hian Bengaluru FC chu 0-1 in an hneh lo.

Albert Roca hoten an penalty hmuh goal-ah an chantir laiin Khalid Jamil-a hoten an penalty hmuh an hmang ṭangkai ve lo. Sum hmang tam Blues leh Mizo club danglamna chu penalty chauh a ni.

Nizan khan semifinal pakhat zawkah Mohun Bagan leh East Bengal te an inkhel a, Kolkata Derby result hi kan hre hman lo. Bengaluru FC-in final an luh takah chuan Fed Cup final hi May 21, Pathianni zanah khelh a ni ang.

Mizo panga

Bengaluru FC coach Albert Roca-a'n Mizo club hmachhawn turin Mizo player starting eleven-ah a dah lo a, semifinal-a Mizo hlanga khelhtirtu AFC boss Khalid Jamil-a'n Mizo panga inkhel bul a ṭantir thung.

Aizawl FC tan India squad-a koh thar Lalruatthara leh R. Laldanmawia bakah Lalramchullova, Zohmingliana Ralte leh Brandon VL Remdika ten inkhel bul an ṭan.

Danglamna Penalty

Minute riatna lekah Brandon VL Remdika'n ball petchhuah a tumna lamah Blues midfielder Alwyn George tlan lut a pet thlu a, penalty a chawi.

Bengaluru tana rawn pen chhuak Cameron Watson-a'n goal kilah petin AFC keeper Albino Gomes-a'n ring dik mah se a khawih hman lo.

Goal keng tel lo Kamo

Aizawl FC-in sûtna hun ṭha an nei nghal a, captain Alfred Kemah Jaryan-a pass chu Ivorian forward Bayi Kamo Stephane-a'n Blues offiside trap aṭanga tal putin a um a, goal khung ngeina tur­ah Spanish defender Juanan-a'n hnung lam a ṭangin a tackle hman.

Hemi hnu hian Kamo hian Chullova cross chu vengtu nei lo mah se goal zawnah a tauh thei lo. Ivorian forward goal hmaah a vannei lo a, chakna goal khung thei Danmawia pawhin danglamna a thlen thei bik lo.

Inkhel dul

Cuttack khaw luma inkhel first half-ah Mizo club ang thoin Bengaluru FC pawhin goal khung theihna tur an nei a, second half erawh goal chance a awm meuh lo.

Goal mamawh Aizawl FC goal nawr a na tawk lo a, Syrian midfielder Mahmoud Al Amna-a'n penalty beiseiin box chhungah tlu mah se referee-in spot kawk loin yellow card a pe.

Inkhel dulah Bengaluru lamin ball an chang tam hret a, goal an venghim ṭha.

Penalty hlah

Hun tawp lamah ngaihngam takin Bengaluru FC an awm bik lo. Substitute H. Lalmuankima'n Blues tlar­hnung ṭhiatin keeper Amrinder Singh hna a siam a, Danmawia cross chu Harmajot Khabra-a'n hmun himah a tauh chhuak a, Ruatthara shot goal zawnah a kal lo a, substitute Jonathan Lalrawngbawla ball tauh goal zawnah a kal lo.

Hun pek belh minute sarihnaah Kamo lakah Sandesh Jhingan-a'n penalty a chawi a, Aizawl FC-in beiseina an nei. Chennai City laka penalty khungtu Chullova'n petin Watson ang thoin keeper ding lam kilah pet mah se Amrinder Singh-a'n a dan sak thung.

Federation Cup-a Aizawl FC zinkawng a tawp ta a - I League champion ni nikumah Fed Cup finalist an ni a, kuminah semi final-ah an tla ta.