Nadal lakah Djokovic a tlawm
Rafael Nadal chuan clay court roreltu a nihzia a lantir chhunzawm zel. Zirtawpni zan khan Nadal hian Novak Djokovic hnehin Madrid Open final a inhlangkai.
Spain khawpuia inkhelah Nadal hian 6-2, 6-4 in hnehna a chang, kum 2014 French Open final-a a hneh hnuah tum ṭum hi Serbian tlangval laka hnehna a chan lehna hmasa ber a ni.
Tun hnai kum thum chhungin Nadal hian vawi sarih ngawt a zawnin Djokovic hi a hneh lo a, an intawn tawh zawng zawng vawi 50-ah tun ṭum hi vawi 24 hnehna a channa chiah a ni.
Kum 30-a upa Nadal hian kuminah clay court season duhawm a hmang chho mek, a inkhelh thiamna hmunah hian match 14 khelh tawhin chak loh a nei lo. Nizan khan Dominic Thiem nen final an khel a, he thu buatsaih lai hian result kan hre hman lo.
Nadal a khelh ṭhat tluan laiin world number 2 Djokovic erawhin hun harsa a hmang mek. Grand Slam vawi 12 champion tawh hi a coaching staff nen a inṭhen hlim an ni a, tun thla tawpa khelh tur French Open nomawi a kawl lai humhim tur chuan insiam-ṭhat thuai a mamawh.
Kum 29-a upa Djokovic chuan, "Nadal khan a duh ang thlapin tennis a khel chhuak thei a, kei erawhin unforced errors ka ngah hle thung, chak phu zawkin hnehna a chang," tiin a sawi.