Premier League-ah Chelsea an champion

Tun season Premier League champion chu Chelsea an ni. Italian manager Antonio Conte naute hian Zirtawpni zana West Bromwich Albion 1-0 a an hneh avangin anmahni hnaih bertu Tottenham Hotspur-in an umpha thei tawh lo.

Hawthorns-a inkhelah substitute Michy Batshuayi-a'n Blues chakna goal minute 82-naah a khung a, pound maktaduai 33 man hian a man phu tawkin tun season-ah khel chhuak pha lo mah se champion nemnghehna goal a khung avangin Chelsea ṭantute tan chuan hero a ni pha tho.

Chelsea hian top flight title paruk an la ta a, Premier League tih a nih chinah vawi nga an champion-na chiah niin Manchester United (13) chiah an tluk lo.

Kum 1989 khan Arsenal chu Anfield-ah English League champion an ni tawh a, Gunners tih lohah chuan Blues hi Zirtawpni zana English club te inelna sang bera champion leh thei hmasa ber an ni.

Fak phu Conte

Chelsea hi nikum September thla khan Arsenal leh Liverpool khelmualah an tlawm a, club lian pahnih a hneh loh hi Juventus manager hlui Conte beng harhtuah a ngaih theih. Conte hian Italy lama a hlawhtlin pui tawh ṭhin angin tlarhnungah player pathum a dah a, wing back pahnih a luh tel tir ṭhin bawk.

Conte formation hman hi rei lote chhungin a nauten an man nghal a, league hmahruaitu an nih theihna kawngah a zawnin match 13 chhung zet hnehna an chang thei a ni.

Kum 47-a upa Conte hian Italy national team a enkawl laiin, "Goal khung ṭeuh a ngai lo, kan khingpuite aia khung hnem a tawk mai," tiin a lo sawi tawh; Blues a enkawl hnuah pawh a ngaihdan a thlak chuang lo a, goal khung a ngaih pawimawh tluk zetin a venhim a ngai pawimawh.

Chelsea hian league match 36 an khelh aṭangin goal 76 an khung a, anni aia khung hnem an awm lo. An mahni lamah vawi 29 lutin anni aia goal chhuah tlem chu Tottenham (23) leh Man United (27) te chiah an ni - season hmasaa 10-na team rawn champion pui theitu Conte hian fak a phu. Italian manager zingah Carlo Ancelotti, Roberto Mancini leh Claudio Ranieri te hnuah Conte hi EPL champion thei palina a ni.

Eng nge an sawi?

Champion manager Conte chuan, "Season hmasa dinhmun nena khaikhin chuan kan hun tawn hi a ropui. He hmuna ka rawn kaltirh khan hmasawnna thlen nghal pur pur a har hle, ka duh dan khan kan khel chhuak thei lawk lo," tiin kawng a awlsam loh thu a sawi.

Italian manager Conte chuan sawi chhunzawmin, "Ka ruahman leh suang­tauah anga ka nauten an khelh theih nan ngaituahna ka seng nasa hle a, an khelh tawh ṭhin dante enin ngun takin zir bingna ka nei - a tawpah beisei anga an khelh chhuah angin tun dinhmin hi kan thleng," a ti.

Zaninah Watford nen

Premier League champion thar Chelsea chuan zanin dar 12:30 hian an mual Stamford Bridge-ah Watford an mikhual dawn a, nomawi erawh an la chawi dawn lo.

London club hian Premier League tawp ni May 21, Pathianni zanah khian Sunderland an mikhual dawn a, he hunah hian Blues-in nomawi an chawi ang. Season tawp rual chhuak tur John Terry thlah nan hetiang bak hun hlu leh duhawm hi awm thei chuang lo ang.