Laipui puah zanah City vannei

Arsenal laipui Stoke City khelmualah vawi li a puak a, Inrinni zan Premier League inkhel dangah Manchester City chuan Leicester City 2-1 in an hneh hram bawk. Champions League khelna hmun inchuh boruak a sang chhunzawm zel.

Arsenal manager Arsene Wenger duh lohna au thawm a la reh lo, khelmual chhungah fans lamin banner hmangin an manager chhuak tura an duhna thu an tihlan bakah stadium chungah thlawhtheihna hmangin lantir a ni.

Gunners hian Olivier Giroud-a goal hnih bakah Mesut Ozil leh Alexis Sanchez te goal hmangin khualmualah Stoke 4-1 in an luhchhuah. Arsenal hi an lenluh hnuhnung vawi ruka chak ni hmel an hmuh lohna hmun Bet365 Stadium-ah hnehna hlado an chham theih tak avangin hun tawp hamrik ham a nih meuh chuan Wenger ṭantute thawm a ring thung hle.

Wenger a lawm

Premier League manager

ṭang lai zinga a hna ngai chelh rei ber Wenger-a contract neih lai hi season tawp rualin a tawp dawn a, chhuak tura duh tute thawm a ring hle - a player pawimawh Sanchez leh Ozil te contract chu nipui transfer-ah ngaihtuah a ni chauh dawn bawk.

French manager Wenger-a'n a enkawl chinah Arsenal hian season tin Champions League an la khel ziah a, tunah hian a vawi 22 nan an beisei mek. January thla aṭanga April thlatir lamah result ṭha an neih hleihtheih loh avangin tunah hian league table-a a sang pali zingah an la tel phak lo.

Harhtharna chang Gunners hian tun hnai an league match hnuhnung parukah vawi nga hnehna an chang thei a, match hnih khelh hmabak la awmah point 69 hmuin pangana an ni mek; Sunderland leh Everton te Emirates Stadium-ah an la mi­khual leh dawn - heng club pahnih lakah hian hnehna an chang a, an elpui Man City leh Liverpool ten point an hloh a nih chuan UCL khel turin an tling ang.

Stoke laka Arsenal khelh dan avangin fans an lawm a, an lawmna ti zualtu chu Ozil leh Sanchez ten an theihna sanzia an pholang leh ta kha a ni. Chile international Sanchez hi league goal 50 a khung tlin zanah a malpui hliam vangin thlak a ni a, hliam tuar mah se an khelh danah a lungawi tih a lang.

Kum 67-a upa Wenger chuan, "Inkhel thunun tak chungin hnehna kan chang, kan zavaia kan khel ṭha a nih chuan ka naute zingah hian chona goal khung thei an awm nual tih a chiang. Huaisen takin kan sual a, Stoke khelmuala kan lenglut a nih chuan mimal aiin team thawhhona ṭha a pawimawh. Point thum kan hmuh vangin a lawmawm a, beisei nei zel theia kan awm hi a lawmawm zualna chu a ni," tiin a sawi.

Stoke an hniam

Substitute Peter Crouch-a goal khat tauh luhin awmzia a neih loh avangin Stoke City-in an khelmualah point an hmu lo a, league table-ah 10-na hnuai lama awm chungin season an khar a ngai dawn.

Kum 2012-13 season khan point 42 hmua 13-na ni chungin season an khar a, hemi hnuah a sang 10 zingah an tel phak ziah. Kuminah erawh match khat bak khelh hmabak an nei tawh lo a, point 41 hmuin 13-na an ni.

Stoke manager Mark Hughes chuan, "Minute nga chhung ṭha tak khelh ringawt hi a tawk lo a, point hmu tur chuan a tawp thleng ṭan a ngai tih kan zirchhuak thar chiang hle. A tawp nan Southampton hneh kan tum dawn a, chumi hnuah season chawlh laiin kan inthlak danglam ang," tiin hmasawn an tum thu a sawi.

City an vannei

Eithad Stadium-ah David Silva leh Gabriel Jesus te goal hmangin Manchester City chuan an mikhual Leicester City lakah 2-0 in hma an hruai a, chawlhlak hma hretin Foxes tan Shinji Okazaki-a'n an siphurh a sut ṭhen hnuah Riyad Mahrez penalty chhuih luh pawm a nih loh avangin Pep Guardiola nauten point thum an hlawh chhuak hram.

City goal hmasa luh danah Foxes lamin referee Bobby Mad­ley thutlukna an sawisel nasa hle. Spain international Silva ball pet hi offside position-a awm Raheem Sterling-a'n pet a tum a, mahse a khawih fuh lo thung!

Champion lai Foxes hian an siphurh sut zawh theihna hun an nei, minute 76-naah Gael Clichy-a'n Riyad Mahrez a tihtluk avangin penalty a chawi. Mahrez hian penalty chhuih zuiin a pet dawnah a tawlh palh a, a ke pahnin ball a tawh avangin City goal-ah lut mah se goal atan pawm a ni lo.

City manager Guardiola chuan, "Tun hnaiah Leicester City hian Champions League khelh phu khawpin an khel ṭha a, an lak aṭanga point thum kan hmu thei hi a lawmawm takzet," a ti. Pep hian Premier League champion Chelsea a lawmpui thu a sawi tel bawk.