AFC-in ISL a pawm dawn?
Asia khawmualpuia football thuneitu sang ber Asian Football Confederation (AFC) chuan, FIFA hriatpuina tel loa khelh ṭhin Indian Super League chu inelna puitlingah a pawm dawn nia tarlan a ni. Hetiang a nih chuan ISL hi FIFA hriatpuina hnuaia inelna a ni tawh dawn tihna a ni.
Tun dinhmunah India-in AFC hnuaia inelnaah hmun ruak pahnih an nei. I League champion-in AFC Champions League playoff an khel ṭhin a, an paltlang zawh loh chuan AFC Cup group stage-ah khelhtir an ni ṭhin. Federation Cup champion-in AFC Cup playoff an khel ṭhin thung a, ruahmanna thar ang chuan ISL champion-in AFC Cup playoff hi an khel tawh thung ang.
AFC pawmpuina hnuaia ISL inelna neih a nih theih nan hian AIFF leh sumdawnna lama an thawhpui IMG-Reliance te chuan AFC general secretary Dato Windsor leh AFC- UEFA Affairs head Alex Philips-te tun hnai khan an kawm a ni.
India hian dilna a thlen ang tak chuan AFC hnuaia inelnaa hmun ruak pathum neih a ni a, I League leh ISL champion-ten AFC Cup khelha he inelna pahniha club tiṭhate inelna tur Super Cup-a champion-in Champions League playoff khelh a ni. Hei hi pawm a nih loh chuan I-League leh ISL champion chu playoff khelhtir a, a chak zawk tan ACL playoff khelh leh chak lo zawkin AFC group stage khelh chu AFC hnenah an dil.
Mahse, AFC lam chuan AIFF rawtna pahnih hi pawm loin I League champion-in AFC Champions League playoff khelin ISL champion chu AFC Cup playoff khel turin an ti niin thu a thang mek.
AFC general secretary Dato Windsor chu tun thla tawp lam hian India-ah a rawn kal beisei a ni a, media report dan chuan AFC-in ISL an pawm thu a puang ang.
Danglamna thlentu tur chu
Indian football a insingsa mek a, I League leh ISL suih fin tumna awm chu an la tifel thei lo. Hetihlaia ISL zawk pawh AFC lamin an pawm dawn a nih chuan, Indian football hmel a danglam dawn.
I League leh ISL a ruala khelh tura rawt a ni tawh a, ISL aṭanga Asia inelna khelh theih a nih bawk chuan, player ṭha chuan ISL an pan deuh ṭhup ang. I League club-te hi a ngaiin la awm vek pawh ni se, tun hma I League ang a ni phak tawh lo ang.
Bengaluru FC hian ISL lama kal an duh niin media lamin an tarlang a, East Bengal leh Mohun Bagan pawh an inngaihtuah mek bawk. Anni pathumin ISL an pan vaih chuan, I League hlutna hian ngai a awh tawh lo ang.
Hetihlai hian engkim hi 'rin thu' mai a la ni. AIFF-in engmah an la puang lo a, AFC lam an la ngawi bawk. Thil chiang tak erawh chu May 8-a Bahrain-a AFC Congress neih pah khan AIFF hotu. IMG-Reliance hotute leh AFC hruaitute hi an inkawm ngei e.