Halep a thiam ber

Inrinni zan khan Madrid Open hmeichhe singles final khelh a ni a, seeded pathumna Simona Halep chuan Kristina Mladenovic hnehin a title kawl lai a humhim.

Romanian nula Halep hian tun hnai kum li chhungin Madrid Open final a vawi thum khelhna a ni a, France nula lakah a tir lamah talbuai deuh mah se 7-5, 6-7 (5-7), 6-2 in hnehna a chang. World number 8 Halep hian nomawi chawi tur hian darkar hnih leh minute 43 zet a mamawh.

Player pahnihte hi an vawi li intawnna a ni a, vawi thum hnehna chang tawh Mladenovic hi record nei ṭha zawk a ni. Madrid Open final-ah erawh set hnuhnung ber an khelh laiin Mladenovic hi a hnungzâng na vangin a buai deuh a, a vawi khat nen Halep lakah tlawm ni hmel a hmu ta a ni.

Kum 25-a upa Halep chuan, "Ka title ka hum­him theih avangin ka lawm hle, he hlawhtlinna hian inelna lianah pawh in­rin­tawkna min siamsak ngei ka beisei," tiin a sawi.

Halep hi tennis player beiseiawm berte zinga mi a ni ṭhin, Masters 1000 leh 500-ah te hlawh­tlinna chang tawhin world ranking chhuak thar berah palina a ni ang. A hmabak chu Grand Slam nomawi chawi a ni a, May 28 aṭang­a khelh tur French Open-ah a inlan dawn a ni.