Portugal-ah Benfica champion

Benfica chuan Portugal-ah el phak an nih lohzia pholangin a zawna a vawi li nan Portuguese league (Primeira Liga) nomawi an chawi. Inrinni zan khan Vitoria Guimaraes chu 5-0 ngawtin an sawp a, an hnuai chiaha awm Porto aiin match khatin khel tam mah se an san falna hi point riat ngawt a nih tawh avangin umphak theih an ni tawh lo.

League match khat khelh la hmabak Benfica tan hian Brazil international striker Jonas Oliveira chuan goal hnih a khung bakah Argentine winger Franco Cervi, Atletico Madrid forward hlui Raul Jimenez leh Portugal international Pizzi-te chuan goal khat ṭheuh an khung ve bawk a, Benfica tan an league nomawi 36-na chiah a ni.

Benfica hian Portuguese league nomawi chawi tur hian match 33 khelh tawhah vawi 25 hnehna an chang a, vawi ruk an khingpui inhnehtawkpuiin vawi khat chiah an tlawm a ni. Benfica nomawi chawina kawngah coach Rui Vitoria chu fak phu a ni a, season hmasaa Lisbon club zawmtu hian season zawnin league nomawi a chawipui ta.