Zaninah MSL7 a tawp dawn? Khatla TBL vs Zarkawt BCA
MSL7 Finals game 2 chu zanin 8:30 hian R. Dengṭhuama Hall, Mualpuiah Zarkawt BCA leh Khatla TBL ten an khel dawn. MSL hmasa pahnih champion TBL hian game 1-ah hnehna an chang a nih chuan game 3 khelh a ngai dawn lo - zaninah MSL7 a tawp ang.
Khatla mipui leh Khatla TBL ṭantuten champion nomawi hawn ngei tumin Mualpui an pan dawn a, Zarkawt mipui leh Zarkawt BCA ṭantute erawh chelh an la tum dawn. Zanin hi a tawp zan a nih theih tawh avangin inkhel a hmuhnawm dawn a, ṭhutna ṭha chang duh tan phei chuan kal hma a finthlak ang.
A la harsa dawn
Khatla TBL coach Vanlalnunsanga Ralte (Lana) chuan, "Season li chhung MSL nomawi kan chawi tawh lo a, tun hi kan hun ṭha a nih avangin offensive leh defensive-ah theihtawp kan chhuah a ngai a, kan tihsual a thiang lo," tiin an hun ṭha neih hman ṭangkai an tum thu a sawi.
Lana chuan sawi chhunzawmin, "Game 1-ah hnehna kan chang a, chutihrualin hmabak erawh a la harsa. BCA hi team ṭha an ni a, talent an nei ṭha rual. Quarter tawp bera an khelh dan aṭang khan an theihna sanzia chu kan hre thei ang. Kan fimkhur a ngai dawn," tiin Vanglaini a hrilh.
Game 1 bik ringawt thlir chuan Khatla TBL hi chak nawn mai tura ngaih an ni a, amaherawhchu Zarkawt BCA theihna thlir chuan la lehthlal thei an ni tih a hriat theih. Zanin inkhel boruak a sang dawn a, Levi Bradley Jr. chet ṭhat a ṭul dawn.
TBL coach Lana chuan, "Bradley hian nomawi a duh a, statistics a thlir lo. Team tan a khel a, game 1-ah khan a khel ṭha tawk lo angin lang mah se team tan chuan a ṭangkai. Team angin kan khel dawn," tiin mimala an innghah loh thu a sawi.
Hei le, Zarkawt
Zarkawt BCA-in Mizo baller hmuhnawm pahnih Lalrina Renthlei leh Zonunsanga te an kawl a, an foreigner Joseph Allen pawh a rintlak. Champion lai BCA hi game 1 an chak loh avangin an talbuai lo ang.
BCA coach Lalruatfela (Afela) chuan, "Game 1-ah kha chuan kan kut a kal lo a, engmah kha a dik thei lo. Kan vanneih zan a ni lo. Game 2-ah chuan a danglam tawh ang. Tho chhuak thei turin kan ṭha tawk," tiin a la inringtawk hle.
Zarkawt BCA hian MSL hnuhnung pathumah nomawi an chawi vek a, vanneih vang a ni lo - an team ṭhat vang a ni. An champion theihna tura player pawimawhte an la kawl a, Matthew Lalremtluanga Sailo hi foreigner ang thoin defensive-ah a ṭha a, Khatla TBL lakah pawh hmun pawimawh a chang ang.
Mipui an pawimawh
Danglamna thlen turin mipui an pawimawh leh dawn. Khatla TBL-in ṭantu an neih ṭhatzia chu game 1-ah an pholang. TBL coach Lana chuan, "Khatla mipuite leh TBL ṭantute kan inkhel min rawn ṭawiawm a, min rawn au phur turin kan ngen," tiin entu mipuite inkhel en turin a sawm.
Zarkawt BCA coach Afela pawhin, "MSL7 finals hi tawp tir kan la tum lo a, game hmuhnawm tak kan rawn pho chhuak leh ang. Kan tum ang kan tih theih nan Zarkawt mipuite leh BCA ṭantute theihtawp chhuaha min rawn ṭawiawm leh turin kan sawm che u. In beisei kan tithlawn lo ang," tiin a sawi ve bawk.