Khatla TBL an chak nuamsa

MSL7 Finals game 1-ah Khatla TBL chuan champion lai Zarkawt BCA chu 87-65 in an sawp a, an inthlauhna hi point 22 zet a ni. TBL tan hian K. Lalthianghlima'n point 25 neiin rebounds vawi 14 a nei a, double-double a nei hial.

R. Dengṭhuama Hall, Mualpuiah final chhimtu mipui an ṭhahnem a, inkhel a hmuhnawm phah sawt. Inkhel boruak sangah Zarkawt BCA-in an theihna sang tak an lantir thei lo a, Khatla TBL erawhin an hun ṭha an hmang ṭangkai thung.

Khatla TBL-in bul an ṭan fuh a, first quarter-ah 21-14 a ni nghal. Halftime-ah Zarkawt BCA-in 28 points an neih laiin TBL-in 39 points an nei tawh thung. TBL foreigner Levi Bradley Jr. langsar tawk lo mah se K. Lalthianghlima (25 pts), Vanlalṭhazuala (19), Michael Liansanga (16) leh Vanlalrinchhana (14)ten point 10 an nei tling vek.

Zarkawt erawh third quarter-ah pawh an la insiamfuh thei lo a, point 11 chiah an la nei. Quarter khat chiah khelh tur a awm tawh tihin 27 points-in TBL-in hma an hruai tawh a, Lalrina Renthlei leh a ṭhiante an tho chhuak thei lo.