Ramhlun North-in Armed Veng South an pet tla

LBS Suzuki All Mizoram Inter Village Football Tournament 2022-ah Ramhlun North chuan inkhelh thiam veng Armed Veng South 2-1 in an hneh. Ramhlun North hian semifinal-ah Sialhawk an hmachhawn ang.

Lammual inkhel hmuhnawm takah first half-ah goal a lut lo. Ramhlun North-in K. Lalrosanga hmangin goal an khung hmasa a, Lalrammuanpuia hmangin Armed Veng South-in an sut. Mahse, Ramhlun North captain V. Lalchhuanawma'n an thah leh chiah chu goal-ah pet nghalin a goal zui a, 2-1 in hnehna an chang.

A goal lo maw!
Armed Veng South-in game mawi an khel a, an goal bawh pawh a na. Ramhlun North erawhin goal venhim bakah counter attack hmanga pet goal an tum thung.

Ramhlun North tlarhnungah Benjamin J. Lalrinliana leh PC Zothansanga te an ding khawng ve tlat a, chutihrualin inkhela chungnung zawk Armed Veng South-in chance ṭha an nei ve bawk.

Captain C. Ramdinmawia, Lalnunsanga, Lalrammuanpuia (Apuia) leh Lalhmangaihsanga te goal hmaah an hlauhawm - inkhelh bana sawi zui hlawh erawh Apuia goal pawm loh a ni.

Minute 44-naah AVS winger J. Lalbiakliana (Valpuia) corner pet chu keeper Lalṭanpuia'n a chhut sual a, Apuia'n goal ruakah a tauh goal. Referee-in keeper ṬP-a hi a chhan a, foul a ham. Mahse, replay aṭanga thlir chuan a bula ding Laldinpuia Chawngthu-in tihsual a nei lo, AVS an vanduai.

A goal ta
Ramhlun North pawhin K. Lalrosanga leh PC Lalhruaisanga te hmangin AVS tlarhnung an tibuai ve tho a, chance pawh an nei ṭha. Hnai tak aṭanga Lalpekhlua Jongte ball tauh chu AVS keeper R. Malsawmkima'n ṭha zetin a dang. C. Lalrosanga pawhin hnai tak aṭangin goal zawnah a pet lo.

Second half-ah erawh Rosanga'n a theihna a rawn lantir. Defender Bena'n na zetin goal kick a pet chhuak a, AVS tlarhnungin an hna an thawk tawk lo - Rosanga'n a chakna hmanga chance insiamin goal hmahruai a khung.

Armed Veng South goal bawh a na sawt a, goal khung erawh an harsat. Minute 73-naah ding lam aṭanga cross ball ṭha chu Apuia'n goal-ah a chantir a, Armed Veng South thawm a ṭha hle.

Mahse maw, AVS hi an hlim au thawm pawh a reh hmain Ramhlun North captain Chhuantea'n ball chu goal-ah a pet tlang nghal a, AVS keeper Malsawmkima'n man sualin goal-ah a lut. Ramhlun North thawm a ring ve leh ta thung a, vawi leh khatah inkhel boruak a dang leh ta bawk.

Penalty (?) leh Red card
Armed Veng South-in goal an mamawh tih hriain an nawr chhunzawm a, Ramhlun North an ding khawng ve tlat. Injury time-ah AVS striker Lalnunsanga (Tale-a) chu box chhungah a tlu a, penalty beiseiin referee bulah a tlan nghal. Penalty beisei dang AVS player dangten referee an pan a, Laldinliana Renthleiin referee hi a rawn su thlu.

Referee-in hun rei tak a ngaihtuah hnuin amah sutu Dinliana hi red card a pe a, player dang erawh an him. Ramhlun North-in an goal neih an hum a, goal dang a lut zui lo a, 2-1 in hnehna an chang.