Sialkhawpui thanlai a sang zel e
Sialhawk chuan Mizoram pum huap inelna LBS Suzuki All Mizoram Inter Village Football Tournament 2022-ah final an lut. Nimin khan Lammualah quarterfinal hmuhnawm tak khelh a ni a, Sialhawk leh Farkawn te hun pangngaiah 2-2 in an inhnehtawk. Extra time-ah Sialkhawpuiin goal hnih an khung belh a, 4-2 in hnehna an chang.
Sialhawkin inkhel an thunun zawk a, hun pangngaiah Lalmuankima leh Vanlalbiakdika te hmanga an hmahruaina chu Farkawnin Lalrinpuia goal hnih hmangin an sut ve ve. Extra time-ah Sialhawk tan Rotluangliana leh Vanlalduata ten an khung a, Farkawnin a chhanletna an nei tawh lo.
Goal hnih ve ve
Farkawnin hrem vangin Lalrinmawia, Hmangaihtluanga leh Hmangaihsanga te an chhawr thei lo a, an ṭhat theih dan bera an inlan lo chungin huaisen takin Sialhawk an hmachhawn. Amaherawhchu khelmualah R. Laldanmawia telna Sialhawk an chungnung hret a, hmahruaitu pawh an ni zel.
Minute 21-naah Farkawn tlarhnung ball clear chhuah chu box pawn chiah aṭangin Sialhawk tan Lalmuankima'n a la thla a, ball sawt kang chu goal-ah mawi zetin a pet kum lut.
Farkawnin minute sarih hnuah siphurh an sut a, Lalrinpuia chuan mawi zeta Sialhawk defender a bum hnuin a ke vei lamin goal kilah a dah - goal ṭha bik a ni.
Sialhawk bawkin goal an khung leh a, minute 35-naah Crespo Vanlalhriatpuia freekick pet mawi zet chu Vanlalbiakdika'n a tauh goal. Danmawia leh Sialhawkin chak nemngheh theihna hun ṭha dang nei mah se an hlah ho thei hle.
Farkawn an beidawng lo a, striker Lalrinpuia a class ve bawk. Minute 81-naah Lalrinpuia hian fing taka ball um lutin keeper rawn tlan chhuak chu a 'chip' khum a, an siphurh a sut. Hun pangngaiah 2-2 in inkhel a tawp.
Extra time-ah Sialhawk
Minute 90 chhungin chak zawk an awm lo a, extra time-ah Sialhawkin bul an ṭan ṭha. Minute hnihna lekah Rotluangliana chuan dinglam aṭanga ball ṭha chu um lutin goal-ah a chantir.
Hun pangngai angin Sialhawk an chesual nawn tawh lo. Minute 118-naah vei lam aṭanga Danmawia ball vawrh luh ṭha zet chu Vanlalduata'n kawh zetin a volley goal. Farkawn tan thawhchhuah ngaihna a awm tawh lo a, Sialhawk 4-2 in an chak.
Eng nge an sawi?
Farkawn GSA secretary Lalengzauva Chenhrang chuan, "Republic Veng LC leh veng mipuite chungah kan lawm hle. Ei leh in te min pe a, min thlawp ṭha em em a ni. Bialtu MLA Pu Ramthanmawia chungah a bik takin lawmthu kan sawi a, Farkawn VC team min ṭawngṭaipuite leh thilpek min petute zawng zawng chungah lawmthu kan sawi bawk," tiin a sawi.
Lalengzauva Chenhrang chuan sawi chhunzawmin, "Inkhel bikah chuan theihtawp kan chhuah a, kan player hremte khel thei se chuan kan chak thei turah kan ngai. Chutihrualin kan thlen chinah kan lawm e," tiin Vanglaini a hrilh.
Sialhawk captain R. Laldanmawia chuan, "Siahawk mipui leh khaw chhuakte aṭangin ṭawiawmna kan hmu ṭha a, kan lawm hle. Bethlehem-ah kan thleng a, anni hian information centre-ah min ṭawiawm turin veng mipui min kohsak a, kan lawm takzet a ni," tiin Vanglaini a hrilh.