United-a a buai thu pha lo Pogba

Juventus midfielder thar Paul Pogba chuan Manchester United-a a hun hman a thlirkir a, Old Trafford-a a hun hman chuan a hmasawnna tur kawngah a tibuai niin a sawi a, coach, team, position, engkim mai khan a tibuai niin a sawi!

Kum 29 mi midfielder hian United-a a contract a hman zawh hnuin Juve a pan a, Old Trafford-a a hun hman chu thlirkirin, hlawhtling a inti tawk lo - inchhirna erawh a neih phah lo.

Pogba chuan, "Ka nuna thutlukna ka siamahte khan ka lungawi a, a chang chuan kan thutlukna siamte hian kan beisei min thlen kher lo. Mahse, Manchester-a ka hun hmanah khan ka hlim a, thil tam tak zirin, tunah chuan puitling ka ni tawh a ni," a ti.

France international hian kum 2016 khan Juventus aṭangin United hi a zawm a, a hunlai khan pound maktaduai 89 man niin, khawvela footballer man to ber a ni hial a ni.

Red Devils-a a season hmasa berah hian League Cup leh Europa League-ah champion nomawi a chawi a, mahse, kum 2022-a a chhuahsan pawhin Red Devils tana nomawi chawi dang a nei leh tawh lo.

World Cup 2018-a France champion puitu Pogba chuan, "Manchester United-a kum tin coach thlak kha chu ka tan a harsa takzet. Hliamin min tibuai bawk - rilru lam hi a ni ve bawk a, inkhelh a, a hnua inkhelh leh lohte khan min tibuai a ni.

"United-ah khan engkim mai khan min tibuai deuh vek niin ka hria - coach, team, position zawng zawng khan ka ṭhan zelna turah min dal. Mahse, tunah chuan Old Trafford ka chhuahsan tawh a, Paul dang daih in hmu dawn - tun hnaia ka khelh ṭhin dan aia ṭhain ka khel thei a ni," a ti - United fans tan ngaihthlak a nuam lo ang.

Pogba hian United-ah manager Jose Mourinho, Ole Gunnar Solskjaer, Michael Carrick leh Ralf Rangnick te a hrawn hman.

United-a a season hmasa berah match 51 khelin goal kua a khung a, assist vawi ruk a nei. UEFA Europa League player of the season-ah thlan a ni hial. 2017-18 season-ah match 37 aṭanga goal ruk khungin assist vawi 12 a nei leh a, nomawi erawh a chawi lo.

French midfielder hian 2018-19 season-ah phei chuan match 47-ah goal 16 khungin assist vawi 11 a nei a, a hming a chher hle. Mahse, a hnu season thumah match 91 aṭangin goal riat a khung hram a, assist 22 a nei - a match hnuhnung 27-ah phei chuan goal khat chiah a khung.

United tan match 226 khelin goal 39 a khung a, April khan Old Trafford-a a inlan hnuhnung berah Norwich City a hmachhawn a, fan-ten nasa takin an au el hial - a tawpah United a chhuahsan a, Juve-ah kum li cham turin contract a ziak zui.

Pogba chuan, "Ka ina ka lo haw thei hi ka lawm a, duhthusam ai pawha ropui hi a awm ṭhin a, he hmunah hi chuan ka hlim a ni. Club dang min betu pawh an awm a, mahse, ka thinlung chuan Juventus hi a thlang tlat.

"Juve ka khelh hmasak khan nuam ka ti a, tunah pawh nuam ka ti. A ṭha thei ang bera khelh hi ka duh chu a ni. Bul ṭan vat a, ka team puih theih ka châk tawh hle - a hma aia ṭha zawka tih ka duh a ni," a ti.

Pogba hian Juve-a a hun hmasaah khan match 177 khel hmanin goal 34 a khung a, assist vawi 40 a nei. Season li a khelh chhungin Serie A nomawi a chawi vek a, Coppa Italia (2) leh Supercoppa Italiana (2) nomawi a chawipui bawk.