Local Football a lo kir leh ta

LBS Suzuki All Mizoram Inter Village Football Tournament 2022-ah team 204 zet an tel a, tualchhung football a tinung thar hle. Mizoram football inpui tia sawi theih Lammualah football vangin entu khat tlat mipui an pungkhawm leh ta.

Veng/Khua football
Veng leh Veng, khua leh khua inkhelah entu an ṭha ṭhin. Covid-19 vanga hun rei tak inkhelh theih a ni tawh lo a, infiammite ang thoin mipui an tuihal tawh.

Mahni khua, mahni veng inkhel a nih tawh chuan a boruak hi a danglam ta daih a, veng/khua hmangaihna nen football an thlir avangin engkim kha a hmuhnawm vek tawh. Chak a nuam a, chak loh erawh a hrehawm em em thung. Football hlutna a lang chhuak leh ṭhin.

Chutihrualin mahni veng/khua ṭan turin Lammual pan tam ber mah se ṭan lam bik pawh nei loa Lammual pan pawh an ṭhahnem. Ṭhenkhat chuan tiffin an pai mai a, ni leng ṭhakin inkhel an en a, football vang liau liau a ni.

Football khelh dan hmang a danglam hret hret a, ball vawrh luah luah hmuh tur a tlem tial tial. European football nena khaikhin rual chu ni lo mah se inkhelh dan hmang pawh a changkang chho ve ta zel.

MPL club lamin player ṭha tur an melh a, season tharah Mizoram Premier League a awm dawn avangin player pawh an inchuh nasa ṭan hle.

MPL club chu
Mizoram Premier League-ah hian club pariat an awm a, chung club-te chu Aizawl FC, Chanmari FC, Chawnpui FC, Chhinga Veng FC, Electric Veng FC, FC Bethlehem, FC Venghnuai leh Mizoram Police FC te an ni.

Champion lai Aizawl FC-in sporting director atan I League champion puitu Hmingthana Zadeng an lalet a, coaching staff tur pawh an tifel hnai. MPL-a record nei ṭha ber an nih avangin ṭum dang ang thoin an buk a rit leh ang.

Chanmari FC-in coach atan an fapa rangkachak tia sawi ṭhin Rochhingpuia an la nghet tawh a, an player hlui Thomas Lalengkima'n assistant coach hna a chelh dawn bawk. CFC hi tun transfer-a thawm nei na zinga mi an ni.

Chhinga Veng FC-in coaching staff tur a thuphungin an tifel tawh a, Anand Gurung (coach) leh Lalremruata (manager) te an thawk dun ang. Team enkawltu turte hi Chhingcows hrechiangtu ve ve an ni.

Electric Vengin coach atan Shillong Lajong midfielder hlui Jacob Lalrawngbawla an hmang dawn a, player angin a inziak lut tel bawk ang. Manager atan team hrechiangtu Vanlalsawma Colney a awm ang.

FC Venghnuaiin coach atan Lalrindika Hmar an hmang chhunzawm dawn a, Rindika Hmar hi Lalthlamuana nen an thawk dun ang. Mizo coach ṭha Lalsangzuala Hmarin Chawnpui FC a enkawl dawn a, defender tawnhriat nei ṭha Lalrinchhana Tochhawngin a pui ang.

MPL kaithar FC Bethlehemin coach atan phai lam thlenga tawnhriat nei Victor Lalbiakmawia an hmang dawn a, naupang rual nen an inlar ang. Lalbiaksanga Colney-in champion rinkai Mizoram Police chu a ho dawn a, player tawnhriat ngah ber tur team an ni ang.