Sterling-a'n Man City a thlah

England forward Raheem Sterling chuan Manchester City aṭangin Chelsea a zawm dawn a, nimin khan Citizens thlahna thuziak a ti chhuak.

Kum 27 mi Sterling chuan, "Season sarih chhungin nomawi lian tham 11 kan chawi a, damchhunga hriat reng tlak sulhnu kan hnutchhiah. Hma ka sawn theihna tura min puitu coaching staff te, ka teammate-te, backroom staff, office staff leh fan-te chungah ka lawm hle. Hun duhawm tak kan tawng ho a ni.

"Hun chhuk chho kan hmachhawn a, hun harsa kan hmachhawn hian ka chakna min fiahsak a, kan paltlang. Kum 20 ka nihin Manchester ka pan a, puitling ni chungin ka chhuahsan. Man City kawr ka ha thei hi ka inchhuang hle a ni," tiin a sawi.

Sterling hian Man City tan season sarih chhungin league match 225 a khel a, goal 91 a khungsak. English winger hian Premier League nomawi pali, FA Cup pakhat leh League Cup pali a chawipui a ni.