Chelsea-in Koulibaly leh Ake an dawr

Todd Boehly hnuaia indinthar tum Chelsea-in player an dawr chhunzawm zel a, Napoli defender Kalidou Koulibaly leh Manchester City centre back Nathan Ake chu lakluh tumin an dawr leh ta.

London club hian nipui transfer-ah centre back pahnih Antonio Rudiger (Real Madrid) leh Andreas Christensen (Barcelona) te chu free transfer-in an chân tawh a, defender pahnih hmun ruak luah tur zawn an ngai.

Kum 27 mi Ake hi Chelsea academy aṭanga inzir chhuak a ni a, 2012-17 inkar kha London club tan hian a khel - hetihlai hian Reading, Watford leh Bournemouth-ah te loan-in kaltir a ni bawk.

Kum 2017 khan Bournemouth hi a nghetin a zawm a, season thum a khelh hnuah kum 2020 khan £40mtd-in City hi a zawm a, Pep Guardiola enkawl team tan hian season hnih chhungin match 40 a khel a, goal li a khung.

Senegal captain Koulibaly erawh kum 31 mi niin, Ake aiin a upa zawk a, kum 2014 aṭang khan Napoli tan khelin, Premier League club liante nen sawizawm ni fo mah se tun thlengin Serie A club tan a la khel.

French club Metz aṭanga a professional career ṭantu Koulibaly hian Napoli tan match 317 khelin goal 14 a khungsak a, assist vawi riat a nei tawh bawk.

Serie A team of the year-ah vawi li ngawt a lang tawh a, mahse, Coppa Italia (1) leh Supercoppa Italiana (1) nomawi chiah a la chawi - club level-a hlawhtlinna tam zawk chan beiseiin Chelsea pan a hreh lo ang.

Koulibaly hi Napoli chuan £37mtd an chhiar nia sawi a ni a, Chelsea bakah hian Premier League club ṭhenkhat leh Juventus pawhin an duh nia sawi a ni - London club hian Koulibaly aiin Ake hi he thu buatsaih lai chuan an hnaih zawk.

Chelsea hian City forward Raheem Sterling chu lalut turin inremna an neihpui tawh bawk a, he thuziak i chhiar meuh chuan England international hi an lalut fel tawh hial ang.

Sterling hi Los Angeles-a pre-season tour nei mek Chelsea squad zawm turin a zin chhuak tawh a, pound maktaduai 50 man niin kum 27 mi forward hian kum nga atan contract a ziak dawn.

Chelsea hian University of California, Los Angeles (UCLA)-ah training an nei mek a, July 17, Pathianni zing dar 7:30-ah Club America nen an inkhel ang.

Mexican club an hmachhawn zawhah hian Charlotte FC (July 21) leh Arsenal (July 23) an hmachhawn leh dawn bawk a, July 29-ah Serie A club Udinese nen Italy-ah an inkhel zui dawn a ni.

Thomas Tuchel enkawl Blues hian August 6, zan dar 6:00-ah season thar atana an league match hmasa ber an khel dawn a, khualmualah Everton an lenchilh ang.