India hmaah England an zawr leh ta
Twenty20 series khelh zawh takah India-in 2-1 in England lakah series an la a, ODI series match thum khelh tura an match hmasa berah wicket 10 ngawtin India an chak leh ta.
Men in Blue tan Jasprit Bumrah chuan wicket ruk ngawt a la a, Mohammed Shami chuan wicket thum a la ve bawk - Indian bowler hmaah England batsman-te an che hleithei lo.
England hi over 25.2 lekah an thi vek a, run 110 chiah an tlin - Jos Buttler chu England batsman zinga run 30 siam tling awmchhun a ni a, mualneitu an mualpho.
India tan Rohit Sharma leh Shikhar Dhawan te chuan over 18.4-ah target an um pha der a, England bowler zingah wicket la thei an awm lo - vawiin tlai dar 5:30-ah match hnihna an khel dawn a, England-in insiamṭhat an mamawh.
Duhthlanna dik
Kia Oval, London-a inkhelah ṭhumvawrah India an vannei zawk a, captain Rohit Sharma chuan vawm hmasak a thlang - kum 35 mi batsman hian duh a thlang sual lo chiang hle.
Over thum chhungin England batsman Jason Roy, Joe Root leh Ben Stokes te chu run siam loin an out vek a, Jonny Bairstow (7 runs) leh Liam Livingstone (0) an out leh phei chuan England hian run 26 an siamin wicket nga an hloh fel der tawh!
England tana beisei bo lutuk tur tih kian nan Jos Buttler a rawn ding chhuak a, white-ball captain-a ruat a nih hnua mahni muala a vawi khat nana ODI match captain hian run 30 a siam.
Mahse, Indian bowler ṭha mi Shami kutah Buttler a 'out' ve leh a, over 14.3-ah run 59 siamin wicket sarih an hloh. Hetihlaia England hlauhthawn ber chu chak loh a ni tawh lo a, ODI-a an run (86 vs Australia, 2001) siam tlem ber record khum a ni!
An zawr e
Buttler a awm loh hnuah England tan lower-order lam an rawn pangngai viau a, mahse, Moeen Ali (14 runs), David Willey (21) leh Brydon Carse (15) te run siam chu mualpho zualpui khuhna chauh a ni a, awmzia a nei phak lo.
England hi over 25.2-ah an out vek a, run 110 an tlin hram - ODI match-a India laka run an siam tlem ber ṭum a ni a, mahni muala khel an nih bawk avangin England mualphona belhchhahin a awm.
Indian fast bowler Jasprit Bumrah fak loh theih a ni lo a, kum 28 mi hian over 7.2-ah run 19 chiah a pe a, wicket thum a la bawk. England batsman-ten an intum leh tur atan a ball vawm vuak nat an zir ang.
Bumrah-a wicket lak zingah Jason Roy, Joe Root leh Livingstone te chuan run an siam lo a, Indian bowler hmaah an duck out - an mualpho takzet.
Shami a ropui
England laka a chet dan avangin Bumrah-a'n fak a phu a, hetihrual hian wicket thum latu Shami lam hmaih a thiang lo - India chak zanah hian record thar a siam a, a hre reng tawh ang.
Shami hian over sarih a vawmah run 31 a pe a, wicket thum a la bawk. Shami-a'n a wicket hnihna a lak khan Indian bowler zinga ODI wicket 150 la tura match (80) mamawh tlem ber record a siam a, David Willey a vawm out leh chiah khan ODI wicket 151 a la tling.
Kum 31 mi Shami hian Indian pacer Ajit Agarkar-a record ding lai chu a khum a, cricketer lar tak ni ṭhin Agarkar hian ODI wicket 150 la turin match 97 a mamawh a, Shami hian a khum chiang hle.
Indian Premier League-a Gujarat Titans tana khel Shami hi ODI-a wicket 150 la tura match mamawh tlem pathumna a ni nghal a, Afghanistan bowler Rashid Khan nih rualin, Australian bowler Mitchell Starc (77) leh Pakistan bowler Saqlain Mushtaq (78) te chiah a tluk lo.
Fak tlak Rohit
India tan ṭhumvawra captain Rohit Sharma thutlukna fuh fak loh theih a ni lo a, a khel ṭha em em bawk - kum 35 mi batsman hian run 76 lai rawn siamin a tawp thleng a dam a, India a chakpui chiang hle.
Nagpur tlangval hian run 76 siam tur hian ball 58 chiah a mamawh a, vawi sarih ngawt four vaw chhuakin, vawi nga chu six a vaw chhuak bawk.
Rohit-a dinpui Dhawan chuan ball 54-ah run 31 siamin a tawp thleng a dam ve bawk a, kum 36 mi, Delhi tlangval hian vawi li four a vaw chhuak a, six runs erawh vuakchhuah a nei lo.
India-in a tira ding batsman pahnih hmangin an target an umpha der a, over 18.4-ah run 114 siamin thi an awm lo - chiang takin India an chak a, zaninah an chak leh chuan series an la ang. Match khat khelh tur la awm dawn mah se England-in an umpha thei tawh dawn lo a ni.