Wolves-in Nathan Collins an lalut

Wolverhampton Wanderers chuan Republic of Ireland defender Nathan Collins chu Burnley aṭangin pound maktaduai 20.5-in an lalut a, Molineux-ah hian kum nga chhung atan contract ziakin, a ṭul dan a zira thla 12 dang pawhsei theih tur a ni.

Wolves hi an defender Romain Saiss chuan a contract a hman zawh hnuah a chhuahsan a, Morocco captain hian Turkish club ṭha Besiktas a zawm - Collins hian Saiss-a hmun ruak hnawhkhah a tum ang.

Kum 21 mi Collins hian season hmasa ṭan dawn khan Burnley hi Championship club Stoke City aṭangin a zawm ve chauh a, kum li chhung atan contract a ziak.

Irish centre back Collins hian season chawhma lamah hmun chang phak lo mah se, March thlaa captain Ben Mee a inhliam hnuah hmun a chang chho a, Premier League inhamtanpui zo lo mah se a khelh danin Wolves mit a tlung a, an lalut ta.

Wolves technical director Scott Sellars chuan, "Nathan hi kan lo enthla reng tawh a, player theihna nei sang tak, footballer ṭha tak kan lalutah kan ngai a ni," a ti.

Collins hian season hman zawh takah khan Burnley tan inelna hrang hrangah match 22 khelin goal hnih a khungsak.