Barcelona-ah Raphinha a lut dawn

Leeds United forward Raphinha chuan Barcelona a zawm dawn - Catalan club chuan Brazil playmaker lalut turin a thuphunga inremna a awm tawh thu an sawi a, medical a paltlang hunah contract a ziak fel ang. He thuziak i chhiar meuh chuan an inlalut fel tawh hial mai thei.

Leeds United coach Jesse Marsch chuan, '"Raphinha duhthusam chu Barca tana khelh a ni a, a duhthusam hi a hlawhtlin thuai ka beisei," tiin a lo sawi tawh a, Leeds-in an player kawng an dal lo. Khawthlang media-ten an tarlan dan chuan Raphinha manah hian Barca chuan pound maktaduai 49 an pe phawt dawn a, a khelh ṭhat dan a zirin £54.7mtd thlengin a sang chho thei ang.

Raphinha hian Elland Road-a season hnih hun a hman chhungin league match 65 a khelhsak a, goal 17 khungin assist vawi 12 a nei bawk.

Kum 2020-a Rennes aṭanga £17mtd-a Leeds pantu Raphinha hi Chelsea, Arsenal leh Tottenham Hotspur pawhin lakluh an duh nia sawi a ni a, mahse, Nou Camp lamin a lung a len ber avangin Barca a zawm dawn.

Leeds boss Marsch chuan, "Raphinha leh Manchester City-a midfielder Kalvin Phillips kan hralhna sum hian, club kal zelna turah nasa takin min pui dawn a ni," a ti a, an player ṭhate hralh mah se an tan hlawkna a nih tur thu a sawi.