United-in Liverpool an sawp

Erik ten Hag hnuaia an match hmasa berah Manchester United chuan 4-0 ngawtin Liverpool an sawp a, Jadon Sancho, Fred, Anthony Martial leh Facundo Pellistri te chuan goal khat ṭheuh an khung - Reds-in a chhanletna tur an nei lo.

Bangkok khawpuia team pahnih inkhel hi friendly match tih erawh theihnghilh loh a ṭha a, Red Devils hian hnehna an chan avangin Bangkok Century Cup an dawng.

Rajamangala Stadium-a inkhelah Reds manager Jurgen Klopp-a'n player 32 ngawt khelmualah a luhtir a, nipui transfer-a a lakluhte a enchhin bakah rawlthar 10 zet chu khelmualah a luhtir bawk.

Liverpool hian Bangkok an pan hmain mumal takin training an la nei hman lo a, player ṭhenkhat chu Liverpool aṭanga Bangkok an pan hma lawka squad zawm ve chauhte an ni.

Hetihlai hian United boss Ten Hag pawhin a player a enchhin ve tho a, player 22 ngawt an inlan ve bawk - Liverpool fan-ten striker thar Darwin Nunez-a'n holam taka goal a khung loh chu season tharah hmuh an duh lo ang.