Zaninah MSL3 Finals Mission Veng hmaah Khatla

Tualchhung basketball ngaina­tu­ten an hmuh châk an hmu dawn. Zanin dar 8:00 hian Mizoram Super League season thumna Finals Game 1 khelh a ni dawn. Mission Veng Vikings leh nomawi kawltu Khatla TBL inkhel hi Zonet Zawlbukah pekchhuah a ni ang.

MSL season hnih buatsaih tawha champion ve ve thei TBL leh tun season kal laia team hmuhnawm bera chal ngam Vikings inkhel tur hi sawi len chawp ngai lo a lian sa a ni a, inkhel hmuhnawm en duh tan R. Dengṭhuama Indoor Stadium pan mai tur a ni.

Mizoram chhunga basketball inelna sang ber khel tawh player zinga hmuhnawm bera ngaih, American Ronald March hi Vikings tan champion pui tham a ni em tih fiahin a awm dawn. Khatla tan match thum khel thei lo tura hrem Chris Solomon an rawn kir dawn thung.

Club pahnih player khaikhin chuan duhthlan tur zawk awm lo khawpin an intluktlang a, inkhel boruak thlak danglam thei khawpa pawimawh chu player parukna 'mipui' an ni ang.

Team ṭha TBL
Coach leh player nikawp H. Laldinsanga hoa khel Khatla TBL hi season hnih chhung chu team dangte elphak rual lohin MSL roreltu an ni. Kuminah erawh Khatla club hian beisei angin season bul an ṭan ṭha lo a, league round-ah Zarkawt BCA leh Vikings an ngam lo - palina niin semifinal khel team pali zingah a hniam ber an ni.

Mah se, semifinal khelh a ni a, India player nei thei MSL club ten an player ṭha an chan laiin Khalta erawhin a thlak nan Akash Deep Hazara an chahlut thei a, final an thlen phahna chhan pakhat a ni. Hazara leh MSL season hmasa ber MVP Mapuia te hmangin league round lama hneh loh tawng lo BCA chu semifinal aṭangin an hnawt chhuak - season tir lam nen chuan khaikhin chi a ni tawh lo ang. Zaninah hian Chris Solomon bakah hian West Bengal tlangval Akash a inlan dawn bawk, anni pahnih bakah Mapuia hi ven ngun ngai bik a ni ang - Khatla TBL hi team dang daih an ni tawh.

TBL manager Lalawmpuia Pachuau chuan, "Vikings hi kan huphurh lo, inbuatsaihna kan nei ṭha hle. State pawn player-te chungah rinna kan nghat ngam a, chutih rualin kan tualchhung player-te pawh hi an khelh ṭhat ni chuan team dang hneh thei tur khawpa ṭha an ni," tiin Vanglaini a hrilh.

Most Valuable Player nilai Van­lalmuana'n BCA nena Game 3 an khelh ṭumin a khelfuh tawk lo chungin point 9 a la nei thei a, captain Vanlalnunsanga pawhin 3-points luh a harsat lo. Gospel Lal­thawmmawia leh Eddie Zai­thanmawia te pawh hi an khelh fuh ni chuan dan harsa tak an ni a, Nelson Lalrohlua leh R. Lal­malsawma te langsar loin an ṭangkai ṭhin hle.

TBL-in kum liam ta lama nomawi an chawi theih chhan langsar tak pakhat chu state pawn player an neih ṭhat vang a ni ṭhin, kuminah erawh team dang aiin an state pawn player-te chungnunna sawi tur a tam bik lo a, nomawi humhim tur chuan an thawhrim a ngai ang.

Coach a fimkhur
MSL3 league round-a team pahnih an intawn ṭumin Vikings hian 81-60 in hnehna an chang, an inthlauhna hi point 21 zet a ni. Hemi ṭum hian season hmasa TBL champion puitu Vishesh Bhriguvanshi bakah Garry Gill leh Chris Solomon te an tel - Vikings hian March leh Rikin Pethani te an nei thung.

An hneh hnu hmachhawn dawn mah se Vikings coach a ṭawng fimkhur hle, Reuben Lalchhandama chuan, "Kan intawn hmasa zawk kha chu sawi chi a ni tawh lo, tunah chuan team thar ve ve ang mai kan ni tawh. TBL hian nasa takin hma an sawn a, keini lam pawh kan  ṭha tawlh tawlh bawk - kan naute an talbuai loh chuan hnehna kan chan theih ka beisei," tiin Vanglaini a hrilh.

Vikings hian tualchhung player hmuhnawm Lalrina Renthlei bakah BCA guard hlui Michael F. Lalawmpuia an nei, an khelh ṭhat ṭum chuan chak pui tham an ni. Mission Veng club hian MSL final an vawi khat khelhna tur a ni a, inkhel boruak sanga an talbuai loh nana fuih turin court chhungah captain Moses Zoremmawia mawhphurhna a sang zual ang.

Tun ṭumah hian Pethani hmel kan hmu dawn lo a, Vikings innghana tur chu March a ni ang. Slam dunk contest-a pakhatna hi match khata point 40 chuang score thei a nih avangin TBL tan ven ngun a ngai khawp ang.

Mission Veng Vikings manager H. Lalhruaitluanga chuan, "March hi player ṭha bik a nih zia kan sawi fo a, chutih rualin player pakhat ve mai a nih avangin engkim a ti thei bik lo. A ṭha thei ang bera a khelh theih nan kan theihtawp kan chhuah dawn a, Mizo game a hriatchian tawh bakah chawlh hahdamna hun ṭha a neih avangin zan dang zawng aiin a chet ropui kan beisei," tiin a sawi.

Vawi 3 nan
Khatla TBL hian MSL nomawi vawi thum chawi turin hmabak an ngah tawh lo, season hmasa bera an hneh tawh Vikings lakah hnehna an chang leh a nih chuan lungthu an kim dawn - club dang tan an record nih rual tur chuan hun a duh rei tawh khawp ang. TBL manager P. Om-a chuan, "Kan nomawi humhim turin inbuatsaihna kan nei ṭha tawk a, tun season league round-ah khan hneh lo mah ila tunah chuan result a danglam tawh ang," tiin nomawi humhim an tum thu a sawi.

Vawi 88
Vanglaini zawhna chhangin Mission Veng Vikings manager H. Lalhruai­tluanga chuan an inbuatsaihna ṭha chuan rah ṭha a chhuah theih ngei a beisei. Ahruaia chuan, "Tualchhung player-te hian MSL3 atan hian vawi 88 zet practice an nei tawh a, an thawhrimna vanga final thleng thei hi kan ni. An thawrim rah an seng theih nan zaninah hian ṭha taka an khelh chhuah theih ka beisei," tiin a sawi. Vikings manager hian Tualchhung player-te thawhrimna chu fakawm a tih thu a sawi tel bawk.