White Hart Lane thlah na'n Spurs-in Manchester United an hneh
Tottenham Hotspur-in kum 118-a upa an khelmual - hun nuam leh hrehawm an lo tawn tawhna hmun White Hart Lane-a an match hnuhnung berah Manchester United 2-1 in an hneh.
Pathianni zan inkhelah Spurs-in inkhel an thunun a, mualneitu tan Victor Wanyama leh Harry Kane ten goal an khung. White Hart Lane-a goal hnuhnung ber erawh England leh United tana goal khung hnem ber Wayne Rooney-a khung a ni.
Nomawi bo mah se
Tottenham-in West Ham United an hneh loh hnuah league nomawi an beisei ngam tawh lo a, Chelsea-in Zirtawpni zanah West Brom hnehin Mauricio Pochettino naute champion beiseina a tawp.
Amaherawhchu Spurs hian United an hneh chiah hian pahnihna dinhmun an nemnghet a, Argentine manager Pochettino hote hi coach ropuia an sawi Jurgen Klopp, Pep Guardiola, Arsene Wenger leh Jose Mourinho nauten an umpha thei tawh lo.
Spurs hmelma Arsenal ṭantute chuan Tottenham chunga an awm apiangin season tawpah St Totteringham's Day an hmang ṭhin a, kum 1995 aṭangin Gunners hi table-ah a chung zawkah an awm char char. Tun season-ah erawh tu nge sang zawk tih zawh nawn a ngai tawh lo - Spurs-in season tawp dawn thlenga nomawi an beisei laiin Arsenal erawh Champions League khelh phak tumin an ṭang hle.
Mangṭha Lane
Champions League an khelh chian tawh avangin Pochettino-a'n White Hart Lane-a an match hnuhnung ber chu anmahni ṭantute tih lawm nan hman a tum thu a sawi lawk a, Europa League-a champion tum vanga player ṭha awltir United-in kawng tinrengah an ngam lo.
Minute rukna lekah Ben Davies-a corner pet chu Wanyama-a'n a tauh goal a, minute 48-naah Danish midfielder Christian Eriksen ball siam sak chu Spurs forward Kane-a'n goal-ah a chantir leh bawk.
United goalkeeper David de Gea-a'n hna a ngah a, Spurs-in goal dang an khung belh loh bakah minute 71-naah Rooney-a'n goal a khung avangin nuam sa takin mualneitu an chak lo.
Inkhelh banah Spurs ṭantute flag nen khelmual chhungah an tlan lut a, buaina siam an ni lo - an stadium thlah nana che an nih avangin chanchin ṭha lam a ni.
Poch a lawm
Tottenham boss Pochettino chuan, "Kan supporter-te hi season tluanin kan chungah an ṭha a, anmahni tih lawm nan theihtawp chhuahin chak kan tum a ni," tiin mipui lawmna siam an tum thu a sawi.
White Hart Lane chungchang sawiin Poch chuan, "White Hart Lane hi a danglam a, kan ngai khawp ang. Chutihrualin stadium thar neih hun pawh kan nghakhlel e," tiin a sawi. Spurs hian tun season league-a an mualah chak loh an tawng lo a, pahnihna an nih theihna chhan a ni.
Spurs hian season tharah Wembley Stadium chu home match khelh nan an hmang ang a, 2018-19 season aṭangin stadium thar an luah lut ang. Stadium thar hi White Hart Lane awmna hmunah tho hian a awm dawn a, eng emaw zat chu sak tawh niin mipui 61,000 lenna tur a ni.
Final ngawr ngawr
Manchester United manager Jose Mourinho chuan, "Hnualna tur ka nei lo. Mi tam tak chuan risk kan la nasa mah mahah an ngai a, amaherawhchu loh theih loin Europa League hi kan thlan zawk a ṭul a ni. Ashley Young, Luke Shaw, Marcos Rojo, Zlatan Ibrahimovic leh Tim Fosu-Mensah te hi dam ṭha vek se player thlak kual thei ila, match zawng zawng chak ka tum ang. Player 14 aṭanga 15 chauh neih chuan chak vek theih a ni lo a, thutlukna siam a harsa lo," tiin league match a ngaih pawimawh loh chhan a sawi.
Portuguese manager chuan a thutlukna tichiangin, "Match khat chauh khelh tur kan nei tawh a, chu chu Premier League a ni lo," a ti. United hian Europa League final-ah Ningani zan dar 12:15 khian Ajax an hmachhawn ang.