Champions League khel tur Liverpool?

Liverpool tan season thara Champions League khel turin match khat chiah chak a ngai ta - Reds hian Pathianni zan khan West Ham chu khualmualah 4-0 ngawtin an sawp a, league match hmabak match khat an la neihah hnehna an chang a nih chuan an elpuite result-ah an innghat buai tawh dawn lo. A tawi zawnga sawi chuan, an kutah engkim a innghat tawh tihna a ni.

Reds-in pathumna dinhmun an luah mek a, an hnuaiah anni aia match khata khel tlem Manchester City leh Arsenal an la awm. Liverpool-in May 21 zanah Middlesbrough an mikhual ang a, City-in West Brom leh Watford an la hmachhawn dawn. Everton leh Sunderland la mikhual tur Arsenal tan an hmabak match hniha chak bakah club pahnih chetsual chan a ṭul tawh - Liverpool result hi Gunners tan chanchin lawmawm lo a ni.

Brazilian magician

Liverpool-in an match hnu­hnung berah James Mil­ner penalty hlah vangin Sou­thampton an inhnehtawkpui a, Gunners leh City-in hnehna an chan bawk si avangin season thara Champions League khel tur chuan hnehna chan ngei ngei a ngai tawh tih an hria - London Stadium-ah chak duhna thinlung nen Liverpool an inlan a, Reds ṭantu tan an player-te che vel kha a hmuhnawm khawp ang!

Philippe Coutinho chu Li­ver­pool tan innghahna a ni a, Brazilian midfielder hian a khelh dan hmangin khawvela player 'hot' ber pawl a nih chhan a pholang - 'The Little Magician' tia hminglem an pek hian minute 35-na lekah Daniel Sturridge tan goal hmahruai a siam sak a, second half-ah goal hnih a khung bawk.

Barcelona nena sawizawm hlawh tak midfielder hian Georginio Wijnaldum-a goal shot-in bar a per hnuah a per lehlam chu minute 57-naah an goal hnihna khung nan a hmang a, a goal khung aṭanga minute li hnuah Reds counter attack rang tak chhawr ṭangkaiin goal thumna a khung zui. Hammers-in tih theih an nei tlem tawh a, Divock Origi chuan chak nemnghehna goal khung ve lehin Liverpool an chak chiang.

Hei le Sturridge!

January 2-a Sunderland laka inkhel bul a ṭan hnua Liverpool tana goal la khung leh lo Sturridge-a'n starting eleven-ah hmun chang chungin West Ham a hmachhawn a, Jurgen Klopp-a'n duh a thlang sual lo tih lantir nan goal hmahruai a khung. English striker hian Reds goal hmasa ber khung tur hian Hammers offside trap siam chu bumin ṭha zetin ball a tlan luhpui a, player class sang a ni tih pholangin goalkeeper Adrian-a bum hnuah a khung.

Kum 27-a upa striker hian SAS tih hminglem pu chunga Luis Suarez nen an khelhdun laiin a hming chher viau mah se hliam vanga a buai fo avangin beisei a phak lo a, tun season-ah Premier League match 17 chiah la khelin goal thum a khung. Sturridge-a'n theihna a nei sang tih hmuh hmaih tur a awm lo a, buaina erawh a inhliam ngun lutuk hi a ni.

England international hi a inhliam hnem miau avangin Klopp-a hnuaiah hmun a chang tam hleithei lo a, season tharah Anfield chhuahsan mai tur anga sawi thawm hial a ri chhuak. Sturridge-a'n Anfield-a a hmalam hun zel tur chiang takin a sawi lo a, season thar a lungkham loh thu erawh a sawi - a cham dawn tihna em ni? tih chu khawthlang media te inzawhna a ni leh ta.

Klopp a uang duh lo

Liverpool manager Jurgen Klopp chuan, "Goal ṭha tak tak kan khung a, mahse West Ham khan chawlhlawk hman hma khan an si phurh sutna remchang tak tak an nei. Ham­mers an vanduai a, keini kan vannei thung a ni," a ti a, goal li ngawt khung mah se vanneih vanga chakah a inngai.

Klopp chuan relegate tawh Boro nena an inkhel tur thlirlawk nghalin, "Middlesbrough hian khelh chhan tur an nei tawh lo a, keini erawh kan theihna zawng zawnga kan khelh a ṭul thung - hei hi dressing room-ah pawh ka player-ten an sawi hmasak ber a ni. Hnehna kan chang a nih chuan Champions League-a khelh kan phu a, kan chang lo a nih chuan kan phu lo a ni mai," a ti.

West Ham manager Slaven Bilic chuan, "Season harsa tak a ni a, ka naute zingah inhliam an tam avangin duh angin engmah a kal thei lo. Mahse, kan tan chuan tun season hi zirlai ropui tak a ni a, nakinah kan la ṭhatpui ka beisei a ni," tiin a sawi.