Madrid roreltu Nadal

Rafael Nadal chuan Dominic Thiem 7-6 (10-8), 6-4 a hnehin a vawi nga nan Madrid Open title a la a, nimina ATP ranking chhuak thar berah palina dinhmun a luah chho nghal bawk.

Pathianni zan khan Spain khawpuiah final khelh a ni a, khawtual tlangval Nadal-a'n bul a ṭan fuh lo zawk. Kar hmasa Barcelona Open final-a a hneh tawh lakah hian set hmasa zawk game thumnaah service a hloh a, 3-1 in a hnufual.

Mahse, clay court-ah Nadal a buai chhunzawm lo. Darkar khat leh minute 18 an khelh hnuah set khatna a la hram a, set hnuhnung zawkah erawh vawi khat Thiem-a ser­vice chhuhsakin hnehna a chang tlang ta a ni.

Kum 30-a upa Nadal hian semifinal-ah Novak Djokovic a hneh a, Ma­drid Open title a lak takah chuan ATP World Tour Masters 1000 title pawh 30 zet a la ta a, Serbian tlangval nen hian la hnem ber an ni.

Spain tlangval Nadal hian tennis a khelh hun chhungin nomawi 72 a chawi tawh a, clay court bikah hian 52 la tawhin a inkhelh thiamna hmunah hian kuminah match 15 khel tawhin hnehna a chang fai vek.

World number 1 hlui Nadal hian Grand Slam vawi 18 champion tawh Roger Federer khumin world number 4 a ni leh ta a, kum 2016 October thla hnuah a sang pali zinga a tel lehna hmasa ber a ni - Nadal hi May 28 aṭanga khelh ṭan tur French Open champion ni tura rinkai a ni leh tawh.

Grand Slam vawi 14 champion tawh Nadal chuan, "Tun hnai player ṭha ber zinga mi nen title pawimawh tak kan inchuh a, hnehna ka chang thei hi ka lawm hle. He hmuna in­khelh hi a nuam a, Madrid a nih avangin ka tan thil hlu bik a ni," tiin a sawi.