Feyenoord champion puitu Kuyt
Kum 36-a upa ni tawh mah se Liverpool striker hlui Dirk Kuyt-a'n a thiam a la theihnghilh lo tih a pholang - Pathianni zan khan Dutch league-a an match hnuhnung berah Feyenoord tan hattrick a siam a, Heracles Almelo chu 3-1 a hnehin kum 1999 hnua a vawi khat nan league nomawi an chawi. Feyenoord hian season tluanin table chung chhuahsan an nei lo a, 1997-98 season-a Ajax hnua he dinhmun luah leh thei hmasa ber an ni.
Pathianni zan inkhel ṭan a nih hma hian Giovanni van Bronckhorst-a naute hi an hnuai chiaha awm Ajax aiin point khat chiahin an sang a, champion nomawi chawi tur chuan chak ngei an mamawh. Kuyt hian second 38-na lekah goal hmahruai a khung nghal a, minute 12-naah khung belhin minute 84-naah chak nemnghehna leh a hattrick ni nghal a khung bawk.
Netherlands tana vawi 104 inlan thei Kuyt-a'n goal hmasa ber a khung chiah khan Feyenoord tan league-a a goal 100-na chiah a ni. Dutch striker hian kum 2006-a Liverpool a pan hman khan Feyenoord tan season thum khelin inelna hrang hranga match 122 a inlanah goal 83 a khung sak hman a, Reds chhuahsana Fenerbahce a pan hnuah 2015 khan a club hlui hi pan lehin season hmasa khan match 38 khelin goal 23 a khung. Tun season-ah pawh match 38 tho khelin goal 15 a khungsak a ni.
Inkhel lehlamah Willem II lakah Ajax chu 3-1 in chak mah se Feyenoord-in hnehna an chan miau avangin nomawi erawh an chawi ta lo - record erawh an siam tho. Manager Peter Bosz chuan Eredivisie (Dutch league) chanchina starting eleven naupang ber luh tirin a player-te kum zat hi chawhrualin kum 20 leh ni 139 ṭheuh ang an ni a, an zinga upa ber captain Davy Klaassen chu kum 24 a ni!