Bagan-in East Bengal an hneh
Federation Cup final thleng turin champion lai Mohun Bagan chuan an hmelma East Bengal 2-0 in an hneh. Mariners hian May 27, Pathianni zan dar 7:00-ah Aizawl FC hnehtu Bengaluru FC nen final an khel ang.
Pathianni zana Barabati Stadium, Cuttack-a semifinal khelhah Bagan tan Darryl Duffy-a'n minute 35-naah a khung a, Balwant Singh-a'n minute 84-naah khung lehin Red and Gold-in goal an khung ve lo.
Inhnehtawk
Goal luh dan thlirin Mohun Bagan hi awlsam taka chak niin lang mah se inkhel aṭanga thlir chuan East Bengal tlarhma vanduai ṭum an tawng fuhah a ngaih theih. Kolkata Derby a nih miau avangin inkhel boruak a sang a, club pahnih ṭantu engemaw zatin Cuttack-ah an club ṭan an ṭawiawm.
East Bengal-in Willis Plaza hmangin chance ṭha an nei nghal a, Trinidadian striker hi goal hmaah a hriam tawk lo. Red and Gold tan Plaza bakah Rowllin Borges, Wedson Anselme, Mohammed Rafique leh Bikash Jairu ten chance ṭha an hlah a, Bagan keeper Debjit Majumder khelh fuh ni an tawng fuh bawk. Bengali keeper Majumder hi hero of the match a thlan a ni.
Mohun Bagan tlarhma erawh an hnaah an chiang a, vei lam aṭanga minute 35-naah Sony Norde cross chu Duffy-a'n nalh takin a tauh lut a. Hun tawp hma minute ruk a la awmin Sehnaj Singh-a ball pek chu captain Katsumi Yusa-a'n cross-in box chhunga awm Balwant-a'n a theihna san zia pholanna atan a hmang.
Goal khung tam
Bagan forward pahnih Darryl Duffy leh Balwant Singh ten kumin Fed Cup-ah goal thum ve ve an khung a, hetiang zat bawk hi Mizo tlangval R. Laldanmawia'n a khung.
Bagan hi Fed Cup champion lai an ni a, nomawi an chawi theih nan Jeje Lalpekhlua'n goal riat khungin best player chawimawina a dawng bawk. Tun season-ah erawh Jeje-a'n khelhna hmun a chang tam tawk lo a, goal khat chiah a la khung.
Blues Vs Bagan
Season liam ta I League champion Bengaluru leh Fed Cup champion Mohun Bagan te hi AFC Cup-ah group khatah an awm ho a, Blues hi hmahruaitu ni mekin knockout stage an lut tawh a, Bagan erawh an tla tawh.
AFC Cup lamah Fed Cup final tem lawkna a awm dawn. Kolkata-ah India rama club hming langsar pahnih hi May 17, Nilaini hian an inhmachhawn phawt ang a, May 21-a final khel turin Cuttack an pan lehnghal dawn a ni.