Goal li khungtu Barca leh Real an inum zel
Pathianni zan La Liga inkhelah Barcelona leh Real Madrid-in an khingpui 4-1 ve ve in an sawp a, La Liga nomawi chawi tur a la chiang thei lo. Barcelona tan Neymar-a'n hattrick siamin Las Palmas lakah Catalan club hnehna a chanpui a, Real tan Cristiano Ronaldo-a'n goal hnih khungin Sevilla lakah an chak thung.
Barcelona-in match khat chiah khelh tur an nei tawh a, Real Madrid-in match hnih an la nei thung. Catalan club tan nomawi chawi turin an match hnuhnung bera Eibar hneh bakah Real tawlhthluk chan a ngai a, Zinedine Zidane-a naute tan Barca chak pawh ni se Celta Vigo leh Malaga aṭanga point li an hlawh chhuak thei a nih chuan champion nomawi an chawi ang.
Barca tan Neymar
Las Palmas khelmualah hnehna chang turin Barcelona-in harsatna an tawk lo. Minute 25-na lekah Neymar-a'n goal hmahruai a khung a, Luis Suarez siamsak a ni. Minute hnih a liam hman chauh tihin Neymar-a'n hna ṭha thawhsaktu Suarez a duhsak let ve thung a, Uruguayan striker tan an goal hnihna tur a siamsak. Goal dang lut loin chawlhlawk hman a ni.
Minute 63-naah Barca thin phu tih ranin a awm a, Palmas defender Pedro Bigas chuan Kevin-Prince Boateng hnen aṭanga a ball hmuh chu an si phurh sut ṭhen nan a hmang. Mahse, Barca an ṭang sawt a, Neymar bawk inlarin minute 67-naah Ivan Rakitic ball ṭha zet chu a tauh lut. Brazil captain hian a la duhtawk lo, minute 71-naah Barca tan khualmuala a hattrick siam hmasak ber ni turin a goal thumna a khung.
Enrique a beidawng lo
Barcelona coach Luis Enrique-a'n Real an tawlhthluk ngei a beisei a, "Real hian an hmabakah match hautak Celta leh Malaga lakah an nei dawn a, club pahnih lakah hian keini pawh kan tlawm. Heng club-te hian keini min hneh thei a nih chuan eng club pawh tlawm turin theihna an nei," tiin Real a sawi ṭhaih.
Enrique hi Malaga-in Real an duhsak dawn nia sawi angin tarlan a ni a, mahse Spanish manager chuan he thu lengvak hi a pha. Season thara Barca chhuahsan tur coach chuan, "Tumah ka ringhlel lo. Tih theih kan neih awmchhun chu kan match hnuhnung bera hnehna chan a ni," a ti.
Ronaldo = 401
Real Madrid tan Cristiano Ronaldo chuan Sevilla lakah goal hnih khungin Real tan goal 401 a khung tling ta - heti zat goal khung tur hian match 391 bak a mamawh lo! Kum 32-a upa striker hian Europe league sang pangaa goal khung hnem ber record Tottenham Hotspur legend Jimmy Greaves-a'n a lo siam tawh goal 366 chu a nihrual bawk a ni.
Real hian minute 10-naa freekick sawisel hlawh tak hmangin hma an hruai - Nacho-a'n freekick a pet luh lai hian Sevilla player-te chuan an freekick chawi an la sawisel mek a, an inrin loh lai taka pet niin vengtu nei lo goal-ah a lut.
Minute 23-naah Ronaldo-a'n an goal hnihna a khung a, Stevan Jovetic-a'n chawlhlawk hnuah Sevilla tan khungin woodwork vawi hnih a pet per a, goal ngei tur nia lang chu goalkeeper Keylor Navas chuan ṭha zetin a dan sak bawk.
Real-in Ronaldo leh Toni Kroos hmangin an khung leh a, an chak.
Zidane thukhawchang
Real boss Zinedine Zidane chuan goalkeeper Navas fakin, "Hnehna chan kan phu a, inkhel bul kan ṭan ṭha takzet a, Keylor khan a khel ṭha em em bawk a ni. League nomawi chawi a awlsam dawn lo a, nitin hian kan theihtawp kan chhuah reng a ni," a ti.
Zidane-a hoten champion nomawi an hnaih laiin Madrid khaw club ve tho Atletico chuan pathumna dinhmun an luah chiang ta bawk a, season thara Champions League playoff khelh ngai lo tur hian Real Betis chu 1-1 in an inhnehtawkpui a ni.