Premier League aṭangin Hull an tla

Crystal Palace-in Pre­mier League khel zel turin Hull City 4-0 in an sawp a, Sam Allardyce naute tan Wilfried Zaha (3'), Chris­tian Benteke (34'), Luka Milivojevic (85') leh substitute Patrick van Aan­holt (90') ten goal an khung.

Pathianni zanah Tigers-in goal zawnah vawi khatmah an pet lo a, an chunga awm Swansea an um phak theih tawh loh avangin Sunderland leh Middlesbrough te nen season tharah Cham­pionship-ah an inlan ang.

Crystal Palace-in him duhin English manager tawnhriat ngah Sam Allardyce an la lut a, an tifuh hle. Big Sam chuan, "Kan khel ṭha a, kawng engkimah kan chungnung a ni. Goal li kan khung a, goal kan chhuah lo a, hun tawp lam minute 15 kha chu nuam sa takin kan khel thei a ni," tiin an khelh danah a lungawi hle.

Hull City boss Marco Silva chuan, "Final khel turin Selhurst Park kan tlawh a, bul kan ṭan fuh lo a, Palace kha an duh zawng tak kan pe a ni. He club ka zawm tirh khan risk kan la a, kan tum chu Premier League khelh zel a ni a, kan tlin ta a lo a ni," tiin minute hnih leh second 11 leka Italy defender Andrea Ranocchia tihsual chu an chak loh chhanah a puh.