Tlai dar 5-ah East Bengal vs Aizawl FC Kan la champion thei - East Bengal coach

Vawiin tlai dar 5:00 hian Kalyani Stadium-ah East Bengal leh Aizawl FC an inhmachhawn dawn. Red and Gold coach Mario Rivera chuan an la champion theih thu a sawi.

Kolkata club-in an hmelma Mohun Bagan an hneh loh hnuah coach Alejandro Menendez a bang a, manager thar Mario Rivera hnuaiah chak nghal mah se match hnuhnung zawkah Indian Arrows an hneh lo.

Aizawl FC result a duhawm bik lo. Standly Rosario hote hian match kua an khelh tawhah vawi khat chiah an la chak a, an hnuaiah Indian Arrows chiah an awm. India rawlthar ṭha rual dahkhawmna Arrows hi an relegate theih loh avangin tun dinhmunah season tawp se relegate tur chu Aizawl FC hi an ni.

Aizawl FC-in an match hnuhnung berah Real Kashmir an hneh lo a, Red Army (Aizawl FC ṭantute) ṭhutna lam aṭangin 'Standly Out' tih thawm hriat tur a awm. Inkhelh banah pawh thawm a rin deuh avangin club neitu Robert Romawia Royte-in supporter ṭhenkhat a khap hial.

Hemi chungchang hi sawiin Standly Rosario chuan, "Season liam taa Aizawl FC ka rawn zawm khan tla thei dinhmunah an ding. Match kua khelh tur la awm aṭangin vawi li kan chak a, vawi thum inhnehtawkin vawi hnih chiah kan chak lo. Point 15 kan hmuh avangin pasarihnaah kan invawrh chho. Tunah pawh a danglam lo a, kan la siam 

ṭha thei a ni," tiin Vanglaini a hrilh.

Aizawl FC hian season liam ta khan match 11 aṭangin point kua an hmu a, Standly awm hnuah match kua aṭangin point 15 hlawh chhuakin dinhmun himah an awm. Aizawl FC coach Standly chuan, "Mizo club dinhmun siam ṭha tur hian ka inringtawk a, season ṭha tak kan la hmang thei ang," tiin a sawi. AFC hian tun dinhmunah match riat aṭangin point kua an hmu a, season liam ta aiin an dinhmun a ṭha hret.

East Bengal hian match kua aṭangin point 11 an hmu a, inchhuang tur an ni lo - an chak lo a nih phei chuan Mizo club-ah an hnuaiah an awm hial ang. Chutichung chuan coach Mario Rivera-a'n champion a la inbeisei a, Spanish manager chuan, "Chhiarkawp dana I League a la champion theih chhung chu theihtawp kan chhuah ang. Season chanve khelh tur kan la nei a, tuna player-te hi champion pui thei tur an ni," tiin Alejandro Menendez thachhang dawltu ni ṭhin chuan a sawi.

Red and Gold-ah hian Mizo player Lalrindika Ralte, Brandon Vanlalremdika, Lalthuammawia Ralte leh PC Rohlupuia te an awm a, Bengaluru FC aṭanga an hawh Edmund Lalrindika erawh hliam vangin a la inlan thei lo ang.