Champion Chelsea-in record an hnaih
Premier League champion Chelsea chuan Thawhṭanni zan khan an mikhual Watford chu 4-3 in an hneh a, May 21 zana an match hnuhnung bera Sunderland an hneh chuan Premier League chanchina match 30 chak thei hmasa ber an ni ang.
Chelsea boss Antonio Conte chuan, "A pawimawh ber chu league nomawi chawi a ni a, record siam theihna remchang kan nei a nih chuan kan bawhzui a ṭul bawk. Match 30 hnehna kan chan theih ka ring a, kei leh ka player ten he record siam hi kan duh a ni," a ti a, an champion chian tawh avangin record siam an ngaihven nghal thu a sawi.
Goal nen Terry
Stamford Bridge-a inkhelah Chelsea-in minute 22-na lekah goal hmahruai an khung a, goal khungtu chu captain John Terry-a ni. September hnua league match inkhel bul a ṭan hmasak berah tun season-a Chelsea goal 100-na a khung. Terry hmingṭhat chhung a rei lo. Minute hnih a liam hman chauh tihin English defender hian ball a tauh ṭhat tawk loh avangin Etienne Capoue chuan Watford tan si phurh a sut.
Blues tan Cesar Azpilicueta leh Michy Batshuayi ten goal an khung ve leh avangin champion team hi chak chiang tawhah dah ngam an ni. Mahse Watford an beidawng lo, Daryl Janmaat-a'n a mimal thawhrah hmanga an si phurh a sut ṭhen hnuah substitute Stefano Okaka chuan an si phurh a sut zo - Stefano hi Conte-a'n Italy boss a nih laia ram tana a debut match a khelhtir a ni.
Champion tawh mah se Chelsea-in point insem ngawt erawh an duh lo. Substitute Cesc Fabregas chuan hun tawp nan minute hnih chiah a awm tawh tihah chakna goal a khung a, defender Sebastian Prodl chu a yellow card pahnihna avanga hnawhchhuah zui a nih avangin Watford tan beisei tur a awm tawh lo.
Wembley tan Conte
Premier League-ah Chelsea an champion chiang tawh a, May 27 zanah Arsenal nen FA Cup final an la khel leh dawn. Blues-in Wembley-a an inkhelh hmain Sunderland la hmachhawn dawn tho mah se Chelsea boss Conte-a'n Watford lakah a players chhawr rim ho a hahchawlhtir a, Thibaut Courtois leh Nemanja Matic chu squad-ah pawh an awm loh laiin Diego Costa, Fabregas, Pedro, Gary Cahill leh Marcos Alonso-te chu bench-ah dah an ni.
Kum 36-a upa Terry kaihhruainain rawlthar beiseiawm Nathan Ake leh Nathaniel Chalobah-te ho an inlan. Watford lakah Chelsea tana player langsar ber chu Willian a ni a, Brazilian midfielder hian a ṭhiante khung tur vawi khat a siamsak bakah vawi sarih ngawt key pass a nei thei.
Chelsea champion-na kawnga player langsar te inlan loh zanah Chelsea-in goal thum ngawt chhuah mah se Conte-a'n duh thlang sual a inti lo. Italian manager chuan, "Player pakua lai thlak danglam turin thutlukna ka siam a, naupang rual hun ṭha pek ka duh. Ka nauten a chhanna ṭha tak min pek avangin ka thutluknaah ka lawm a ni," a ti.
Chelsea = 29
Premier League-a match 37 an khelh tawhah Chelsea-in vawi 29 hnehna chang tawhin season khata chak hnem ber record 2004-05 leh 2005-06 a anmahni lo siam tawh tho chu an nihrual a, hnehna an chang leh a nih chuan record thar an siam dawn tihna a ni.
Chelsea boss Conte chuan, "Goal thum kan chhuah a, mah se goal li khungin chance tam tak kan insiam thei. A pawimawh ber chu hnehna kan chang kha a ni a, tunah chuan vawi 30 chaka record siam turin kan rilru kan seng thei ta," tiin record thar siam a tum hle.
Watford manager Walter Mazzarri chuan, "Ka naute khelh dan kha ka chhuang takzet. Antonio Conte hi manager ṭha tak a ni a, ka lawmpui a ni. Players ropui tak tak an kawl a, champion hi an phu a ni," tiin Blues a lawmpui thu a sawi nghal.