Roland Garros-ah Federer kan hmu dawn lo

Roger Federer chu May 28 aṭanga khelh tur French Open-ah a hmel kan hmu dawn lo! Grand Slam vawi 18 champion tawh hi tun season clay court tournament-ah a inlan lo tluan dawn tihna a ni.

Kum 35-a upa Federer hi ranking chhuak thar berah pangana a ni a, hun rei zawk inkhelh zel theih a duh avangin tournament zawng zawngah inlan a tum tawh lo a, tunah chuan grass court a kheh tur Wimbledon atan a hahchawl rih dawn tihna a ni ang.

Swiss star Federer chuan, "French Open khelh ka tum thu ka sawi tawh. Mahse, ka coaching team nen kan sawiho hnuah hun reitak chhung ka khelh theih nan chuan ka taksa mil tawka tournament ka khelh a ngai a, hei vang hian clay court bik chu ka inlan lo tluan dawn ta a ni," a ti.

Kum 2009 French Open champion Federer chuan, "Min ṭan em em ṭhintu French fan-te ka ngai dawn hle a, nakkum lamah chuan Roland Garros-ah kan inhmuh leh ngei ka beisei," tiin tennis chawlhsan mai a la tum loh hmel hle.

Federer hian season hmasa khan a hnungzâng na vangin French Open hi a khel lo, he mi ṭum pawh hian hun tepter tawh takah a inhnukdawk. Kum 1999 aṭang khan Paris-ah hian a inlan ṭan a, kumin hi vawi hnih a inlan theih lohna tur chiah a ni.

Mipa player zinga major title la hnem ber Federer hian hliam vangin season hmasa zawng a khel lo a, kuminah Australian Open bakah Indian Wells leh Miami Open nomawi a chawi tawh bawk - season duhawm a hmang. Mahse, Federer hi a kum a tam tawh bakah hliam a nei ta fo a, a vanglai pawha a hlawhtlin hleihtheih lohna clay court-a a inlan lo hi thil mak a ni hran lo.