Barcelona tlansan tum Real Madrid
Real Madrid hi club ropui tak a ni a, amaerawhchu khawvel player manto ber ni tura Cristiano Ronaldo an lakluh hnuah La Liga nomawi vawi khat chiah an la chawi a, Gareth Bale an lakluh hnuah league-ah an la champion lo. Los Blancos-in Catalan club hnuaia kun reng an duh loh a nih chuan tun season hi talchhuahna hun ṭha a ni.
Zanin dar 12:30 hian Real Madrid-in Celta Vigo khelmual Balaidos an tlawh dawn a, inkhel hi Ten 1-ah a en theih ang. Zinedine Zidane-a hote hian hnehna an chang thei a nih chuan league match hnuhnung ber khelh hmain Barca aiin point thumin an sang zawk dawn tihna a ni.
Champion inum
Real Madrid hian match 36 khelhah point 87 an hmu a, hetiang zat chiah hi match 37 khelhah Barcelona-in an hmu bawk. La Liga-ah hian head to head en a nih avangin point inanga season a tawp a nih chuan Catalan club hi an champion ang.
Pathianni zan dar 11:30 khian Los Blancos-in Malaga an tlawh dawn a, Barcelona-in Eibar an mikhual dawn thung. Zanina Real-in hnehna an chan chuan match hnuhnung bera point khat hmuh pawhin an champion dawn a, an inhnehtawk a nih pawhin Malaga hneha an la champion theih tho avangin an dinhmun a la ṭha zawk tho ang.
Zidane-a hote hian Balaidos-ah point an hmu lo a nih chuan nomawi an thlauhah a ngaih theih. Barcelona-in an mual Camp Nou-ah Eibar an hneh ngei hmel a, Real-in tih theih an nei tawh lo ang.
Inkhel pawimawh
Real leh Celta hi February thlatira inkhel tur an ni a, amaherawhchu Balaidos chu thlipuiin a nuai avangin inkhelh hun hi sawn a ni.
Celta hi table-ah 13-naah an awm mek a, an ṭhat loh vang lam ni loin Europa League an ngaih pawimawh vang a ni. Inelna hrang hrang match hnuhnung pariatah Celta hian chak hmel an hmu lo a, tunah erawh Manchester United hneh loh avangin Europa League-ah beisei tur an nei tawh lo a, Real champion kawng daltu leh Barca kawng sialtu an thei a ni.
Amaherawhchu Celta hian point thum hmuh an tum a nih chuan Ronaldo an dan theih a ṭul dawn a, Portuguese forward hian kartawpa Sevilla 4-1 a an hneh ṭumin goal hnih a khung. Kum 32-a upa Ronaldo hian season ṭha tak hmang lo mah se league-ah ringawt goal 22 khungin assist vawi ruk a nei leh tawh, Real tana chanchin lawmawm loh erawh inhliam vangin Bale a inlan thei dawn lo.
Los Blancos manager Zinedine Zidane chuan, "Ni tinin kan tum ram kan hnaih zel a, chutihrualin a lan ang ngawta awlsam chu a la ni lo. Engpawh thleng thei a ni a, a êng zawnga thlir hi kan duh dan a ni. Kan dam ṭha a, kan theihna zawng zawngin kan khel ang," tiin inkhel pawimawh zia a hrechiang hle.