Coppa Italia final Juventus vs Lazio
Zanin dar 12:30 hian Stadio Olimpico, Rome-ah Juventus leh Lazio ten Coppa Italia final an khel dawn a, treble champion nih tum Juve manager Massimiliano Allegri chuan an tan nomawi hmasa ber a nih ngei a beisei thu a sawi.
Juventus hian Coppa Italia title hi vawi 11 an la tawh a, champion lai an ni bawk. Lazio erawh he inelnaah hian vawi ruk an champion tawh a, nomawi an chawi hnuhnung ber chu kum 2013 kha a ni.
Nomawi pathum?
Turin club hian kartawp league match-ah AS Roma an hneh loh avangin Serie A nomawi an chawi hun an nghah rei a ngai a, Inrinni zanah Crotone an mikhual dawn, an chak a nih chuan a zawna a vawi ruk nan Italy champion an ni ang.
Italian manager kaihhruaina hnuaiah Juve hian a vawi hnih nan Champions League an khel dawn a, June 3 khian Real Madrid nen an inkhel dawn - nomawi pathum chawi thei dinhmunah an ding mek.
Jose Mourinho-a'n a enkawl lai kum 2010 khan Inter Milan chuan season khat chhungin nomawi lian pathum an chawi rual tawh a, hemi hnu hian Italian club zingah treble champion thei an la awm leh ngai lo. Mourinho tih ang tithei turin Allegri tan zanin hi hun pawimawh bik a ni ang.
Kum 46-a upa Allegri chuan, "Roma kan hneh loh vang khan ka chiai hran lo, a pawimawh hmasa chu kawng dik kan zawh leh theih nghalna tur a ni. Inbuatsaihna hun tlemte kan neih chhung hian result ṭha kan neih theih dan tur kan zir chhuak hman ang," a ti.
AC Milan manager hlui Allegri chuan sawi chhunzawmin, "Tunah chuan Cup final atan rilru kan pe a, chumi hnuah league, Champions League chu a tawp berah a ni ang," tiin a indawta nomawi lian pathum chawi a tum thu a sawi tel bawk.
Zaninah hian Juventus-in striker Paulo Dybala an chhawr thei tawh dawn, Argentina forward hi hliam tenau a neih avangin Roma an hneh loh ṭumin inkhel bul ṭantir a ni lo. Mario Mandzukic erawh hnungzâng na vangin a dinhmun a chiang lo thung.
Chak duh Lazio
Lazio hian an league match hnuhnung berah Fiorentina 3-2 in an hneh lo a, inkhelh hmabak pahnih an la neihah hnehna chang pawh ni se season tharah Champions League an khel phak tawh dawn lo.
Juventus striker hlui Ciro Immobile chuan, "Juve hi team ṭha tak an ni tih kan hria, anni hneh tur chuan kan tan tihsual awm lo a khelh a ngai. Final atan hian kan rilru zawng zawng kan seng a, fimkhur takin kan khel ang," tiin a sawi.
Kum 27-a upa Immobile chuan sawi chhunzawmin, "Champions League kan khel phak dawn lo tih kan hriat khan kan rilru a hnual hle. Mahse, tunah chuan lungngaia kun reng hun a ni lo, kan rilru na thawi dam tur leh fan-te duh tihlawhtling ngei turin nomawi chawi kan duh a ni," a ti.