Monaco champion zan?

AS Monaco tan Ligue 1 champion ni turin hna hautak thawh tur a awm tawh lo. Zanin dar 12:30 hian Stade Louis II-ah Saint-Etienne an mikhual dawn a, point khat lek pawh an hmuh belh a nih chuan kum 2000 hnua a vawi khat nan league title an la ang.

Monaco hian Leonar­do Jardim kaihhruaina hnuaiah season duhawm tak an hmang mek, league match hnih khelh hmabak nei chungin point 89 an hmu tawh a, pahnihna Paris Saint-Germain aiin point thumin an sang zawk - PSG hian match khatin an khel tam zawk bawk.

Champion lai PSG aiin goal 17 zetin Monaco-in goal difference an nei ṭha zawk a, an match hnuhnung pahnihah chak lo pawh ni se goal an chhuah vak emaw PSG-in goal ṭhahnem tak an khung a nih loh chuan an champion dawn tho.

European club zinga goal khung thei berte zinga mi Monaco hian tun season kal lai hian inelna hrang hrangah goal 153 an khung tawh a, league bikah goal 102 an nei tawh bawk.