City Futsal Club an champion

LM Store MFA Futsal Cup-ah City Futsal Club an champion a, Venghlui club hi AIFF leh MFA hriatpui inelnaa champion hmasa ber an ni. Veteran category-ah 77 FC chuan Dinthar Futsal Club hnehin nomawi an chawi bawk.

Thawhṭanni zan khan R. Dengṭhuama Stadium, Mual­puiah LM Store MFA Futsal Cup hmawr bawkna neih a ni a, Mizoram football-in futsal hmangin rahbi thar an kai a, hma­sawnna thar hmun tur a awm.

Game rang chu!

Futsal hi football aiin khelh­na hmun a zim bakah khelh dan hmang a dang hret a, ball thiam leh football kalhmang hriate ṭhatna hmun a nih rualin, la thiam lote tana inzirna hmun ṭha tak a ni bawk.

Open category-ah Electric Veng club Thrematai leh City Futsal Club ten game rang takin inkhel an ṭan a, hun tawp thlengin an la che rang.

MPL-ah pawh player che rang midfielder Lalrinchhana chuan Thrematai tan hmun pawimawh a chang a, Chanmari FC goalkeeper Lalmuanawma chu power play player niin a hna a tlin hle.

Thrematai-in Vanlalremsanga hmanga an hma hruaina chu City Futsal Club-in an thiampuipa Isak Vanlalpeka goal hnih

ṭha tak hmangin an chhang let. Zo United midfielder Isak-a a inhliam a, Electric Veng lam­in Paul Ramfangzauva leh Remlalthlamuana-te hmangin an lehthal lehnghal. First half hmain Peter Thangpuia hmangin City Futsal Club-in an sut a, half time-ah 3-3 a ni.

Second half-ah Vanlal­rem­sanga hmangin Thrematai-in hma an hruai nawn a, inhliam damkawr chunga lut Isak-a'n red card a hmuh zui bawk avangin Venghlui club an talbuai. Amaherawhchu, hun tawpah team pahnih rilru a fim tawk lo a, foul a tam hle.

Best player atana thlan C. Lalmuanpuia'n Rinchhana handball vanga penalty (5m) hmuh chu goal-ah a chantir a, hemi hnu hian Muana hian Thrematai-in foul vawi ruk an hmuh avanga an penalty hmuh (10 m) chu keeper Muanawma'n dan sak mah se a per chu goal-ah a chantir leh bawk.

Thrematai-in an si phurh sut tumin an nawr let a, penalty kick (10 m) an hmuh an khung loh bakah hun tawp lamah chance ṭha an hlah a, City Futsal Club keeper Vannunmawia'n hun tawpah a theihna a pho chhuak. Venghlui club-in goal an chhuah tawh lo a, 5-4 in hnehna an chang.

Champion phu 77 FC

Veteran inkhelah Dinthar Futsal Club-in an player pawi­mawh Mizoram Police player Lalropuia khelh theih loh an tuar a, 77 FC lakah an ṭang khawng thei lo.

77 FC tan Shillong aṭang an chah chhoh Lajong player hlui Johny Marboh-a'n goal hmahruai a khung a, Khasi defender hian goal khat dang khung lehin Roliantluanga'n hattrick a siam bakah Dinthar defender T. Lalremruata'n an lamah a tilut a, Zosangliana leh Hmingthansanga ten goal khat ve ve an khung bawk.

77 FC enkawltu leh player Lal­­remtluanga chuan, "Futsal in­el­na hi kan ngaihhlut avangin open category-ah pawh 77 FC junior team an tel a, hemi atana min sponsor-tu Chhiari Allied Engineering, Mis­sion Veng chungah kan lawm hle. Veteran team hi Kim Kim Hardwares, Kulikawn in min sponsor a, champion hmasa ber nih kan duh avangin Shillong aṭang­in kan ṭhianpa Johny kan chah chho a, nomawi kan chawi thei hi kan lawm hle a ni," tiin Vanglaini a hrilh.

Inelna Thlirna Tawi
Veteran - Final
Dinthar Futsal Club 4 - 8 77 FC
DFC : R. Lalbiakmawia 10', 37'; David Lalhmachhuana 22'; HT Vanlalremruata 30'
77 : Johny Marboh 3', 11'; T. Lalremruata 11' (OG); Roliantluanga 15', 36', 39'; Zosangliana 26'; Hmingthansanga 32'
Open - Final
City Futsal Club, Venghlui 5 - 4 Thrematai, Electric Veng
CFC : Isaac Vanlalpeka 8', 9'; Peter Thangpuia 18'; C. Lalmuanpuia 35', 36'
TMT : Vanlalremsanga 3', 22', Paul Ramfangzauva 13'; Remlalthlamuana 15'
Lawmman
Open
Champion City Futsal Club Rs 50,000
Pahnihna Thrematai Rs 25,000
Semifinalist Thyristor leh Denzel FC Rs 10,000
Quarterfinalist Dinthar Futsal Club, Jeny's Home Bake, Rs 1,000
DBI Captial, Samuel FC
Best Player C. Lalmuanpuia, City Futsal Club Rs 1,000
Top Scorer Vanlalremsanga (7 Goals), Thrematai Rs 1,000
Veteran
Champion 77 FC Rs 10,000
Pahnihna Dinthar Futsal Club Rs 5,000
Semifinalist Patea Memorial, G 90's Rs 2,500