May 25-ah Pro Volleyball

Mizoram vol-leyball inelna lian ber Pro Vol­leyball League chu May 25 aṭangin khelh ṭan a ni dawn. Kumin PVL hi GIG Motors Management Team-in an sponsor dawn avangin inelna hmingah 'GIG Motors Pro Volleyball League 2017' tih a ni ang.

Mizoram Volleyball Association leh LPS Vision ṭangkawp chuan nikum khan a vawi khat nan Pro Volleyball League a buatsaih tawh a, mipa team ṭha paruk an inel.

Kuminah mipa team panga - TNT, Hunthar, 3rd MAP, Chhinga Veng leh Ramhlun Sporting Club an inel dawn a, a vawi khat nan hmeichhe league telh a ni ang. Champion hmasa ber nih tumin Power Department Sporting Club, Electric Veng leh Durtlang an inel dawn a ni.

May 23, Thawhlehni zan khian LPS Audi­torium-ah league khuhhawnna Spike Off neih a ni dawn a, May 25, Ningani zan aṭangin inelna hi khelh ṭan a ni ang.

LPS Vision chuan Spike Off leh inkhel zawng zawng hi LPS 1-ah live telecast-in a pe chhuak dawn a, final hi June 20-a khelh tura ruahman a ni.