East Bengal leh ISL inhnimhnai

Kolkata club lian East Bengal chuan Indian Super League khelh an tum niin thu a thang mek a, ISL khel tura dilna ‘Invitation to Bid’ lak hun chhung chu pawtsei turin ISL buaipuitu Football Sports Development Limited (FSDL) hnenah dilna an thlen.

FSDL thuchhuak ang chuan ITB hi May 25 thleng thehluh theih a ni a, East Bengal hruaitu langsar zinga mi Debabrata Sarkar chuan AIFF general secretary Kushal Das chu ISL-a an dinhmun tur sawipui turin a sawm niin media ṭhenkhat chuan an tarlang hial.

ISL-a tel turin khawpui 10 Ahmedabad, Bengaluru, Cuttack, Durgapur, Hydera­bad, Jamshedpur, Kolkata, Ranchi, Siliguri leh Thiruva­nan­­thapuram aṭangin dilna hawn mek a ni.

I League club zingah Benga­­luru FC chuan ISL khelh ve ngei an duh thu an ti­chiang tawh. East Bengal bakah hian Mohun Bagan pawhin dil an tum niin Vanglaini chuan thu a dawng.

ISL-a tel dil theihna khawpui zingah Durgapur hi Mohun Bagan-in academy an neihna a ni a, Siliguri hi East Bengal-in an second home-a an hman a nih bawk avangin Kolkata club pahnih hian an duh a nih chuan ISL an khelh chance a sang hle.

Khawnge I League?

East Bengal, Bagan leh Bengaluru-te ISL lama an pêm vaih chuan I League-in ngaihhlut a hlawh lo sawt dawn tih a chiang a; AFC-ah quota ṭha ber la nei mah se, I League-in a hlutna a hloh phah ngei ang.