Barca leh Bayern-ah kha chuan min ban tawh ang - Pep

Manchester City coach Pep Guardiola a club enkawl hlui Barcelona leh Bayern Munich-ah te kha chuan nomawi chawi loin season khar se an ban theih hial a rin thu a sawi.

Spanish manager Pep Guardiola chuan, "Club lian dangah tun ang dinhmunah hian ding ila, min ban ngei ang. Barcelona leh Bayern enkawl ila, nomawi chawi loh chuan hna chan a ni. City erawhin hun ṭha dang min siam sak a, season tharah chuan result ṭha zawk ka neih pui tawh ang," tiin insiamṭhat a mamawh thu a sawi.

City-in Guardiola hnuaia an season hmasa berah nomawi an chawi lo a, season thara Champions League khel pha turin league-ah palina dinhmun an la hauh chiang lo. Guardiola hote hian Champions League-ah last 16, FA Cup-ah semifinal leh League Cup-ah fourth round an thleng phak chauh a, nomawi an hlat hle.

Guardiola hnuaia City
Premier League 4th* Nizan khan West Brom an khel a, match khat dang khelh tur la awm
Champions League Last 16 Away goal hmangin Monaco an hneh lo
FA Cup Semifinal Arsenal 2-1 in an hneh lo (aet)
League Cup Fourth round United 1-0 in an hneh lo