Cavaliers hmachhawn tur Celtics

Cleveland Cavaliers hman­chhawn turin Boston Celtics an tling ta. Nimin zing khan NBA Eastern Conference semifinal playoff khelh zawh a ni a; Celtics hian Washington Wizards 115-105 a hnehin series 4-3 in an la, Ningani zing dar 6:00-ah NBA champion Cleveland nen conference finals an khel ang.

TD Garden-a semifinal Game 7 inkhelah team pahnih an innuai tawk hle a, Celtics tan point guard Isaiah Thomas chuan point 29 a score bakah assist vawi 12 neiin player langsar a ni a, danglamna thlentu erawh Kelly Olynyk a ni.

Kum 26-a upa, power forward Olynyk hi quarter thumna leh linaah a inlar a, point 26 a score zinga 14 chu quarter hnuhnung bera a neih niin he quarter bikah hian a tir lamah a team hi 25-4 in hma a hruaipui a, kum 2012 hnua a vawi khat nan Celtics-in conference finals an khelh leh theih phah dawn ta.

NBA playoff a khelh china a point score hnem ber ṭum tawngtu Olynyk chuan, "Mitinin kan theihtawp kan chhuah a, a tawpah rah ṭha a chhuha ta a ni. Match sarih chhung ropui takin kan khel thei a, a tawpah huaisen taka kan beih zarah hnehna kan chang," tiin a sawi.